Revista ‘Euro Asia Review’, bën të ditur se në mbledhjen e djeshme të Komisionit parlamentar për Shëndetësi, i është dhënë dritë jeshile ndryshimit të ligjit mbi kontrollin e drogës dhe substancave psikotropike, që do të lejonte përdorimin e prodhimeve të kanabisit për qëllimë mjekësore, transmeton Telegrafi.
Propozimin për ndryshime ligjore e ka dhënë Stojanço Stojkovski, sekretar shtetëror në ministrinë e shëndetësisë, duke u arsyetuar se pacientët kërkojnë që të kenë mundësi të përdorin produkte natyrale të kanabisit nën mbikëqyrje të rreptë, pasi për momentin disa pacientë përdorin produkte të pakontrolluara dhe pa mbikëqyrje të dozës.
Partia në pushtet, VMRO – DPMNE, përmes Sasho Vasilevskit e ka mirëpritur këtë propozim, duke përmendur rast konkret të një pacienti të sëmurë me kancer nga shkaku i përdorimit të prodhimeve të kanabisit në tregun e zi. Edhe LSDM-ja opozitare e ka pranuar këtë propozim, dhe Alen Georgiev ka thënë se ky ndryshim duhet të ndodhë sa më herët.
