Distanca nga Europa nuk do të jetë problem për Shkëlzen Gashin që të marrë pjesë në finalet e Euro 2016. Sulmuesi kuqezi, në një intervistë me tabolidin zviceran “Blick” thotë se është konsultuar me trajnerin Gianni De Biasi para se të transferohej te Colorado Rapids, në SHBA. Gashi shton edhe se transferimi përtej Atlantikut nuk ishte i motivuar nga paratë, ndryshe ai tani do të ishte në Kinë ose Emiratet e Bashkuara Arabe.
Cilat janë përshtypjet e para?
Kur erdha në Denver, në janar, e pashë se çdo gjë më përshtatej me qytetin. Këtu ka shumë gjelbërim dhe male, njësoj si në Zvicër.
Si është niveli? MLS shpesh nënvlerësohet…
Ai që nënvlerëson një ligë me lojtarë si Kakà, Lampard, Gerrard, Pirlo dhe shumë të tjerë, nuk kupton shumë nga futbolli. Stadiumet janë modernë dhe të mbushura plot. Mendimi im është se klubet e ligës amerikane nuk janë pas klubeve të Zvicrës.
Si janë tifozët këtu?
Personalisht nuk kam pasur kontakte me ta. Megjithatë gëzohem se shumë shqiptarë që jetojnë në SHBA më kanë përshëndetur për vendimin tim që të transferohem në MLS.
Colorado Rapids nuk kanë lënë gjurmë në ligën amerikane. Jeni ju ai që do sillni ndryshime?
Kjo është e ekzagjeruar, por atë që kam arritur në Zvicër, pres ta arrij edhe në SHBA. Denveri është një qytet sportdashës dhe këtë e vërejmë edhe nga fitorja në Super Bowl (Denver Broncos fituan para një muaji kupën)
Ju përshkruheni si “designated player”. Sa të rëndësishme ishin paratë për transferimin tuaj?
Nëse do ishte puna për para, tani do isha në Kinë ose Emirate.
Por ju donit të qëndronit larg Baselit. Kishte probleme mes jush dhe trajnerit Urs Fischer?
Përfundimisht jo. Ka pasur interpretime që nuk ishin të sakta. Fakt është: Unë kisha një histori suksesi në Basel dhe gjithashtu edhe ndarje pozitive.
Si lojtar i MLS, i plotësoni kushtet për pjesëmarrje në France 2016?
Kam folur me trajnerin De Biasi përpara se të nënshkruaja këtu. Ai e di sesa i lartë është niveli dhe më ka mbështetur.
Pronarët e Rapids janë edhe të Arsenalit. Mund të transferoheni në të ardhmen brenda klubeve të pronarëve tuaj…
Unë kam nënshkruar me këtë klub për katër vite dhe dua të kem sukses.
