Kandidatja për kryetare e Partisë Demokratike, Edith Harxhi kërkon të rimarrë ‘tokën e xanun’ në PD. E ftuar në Spotlight nga Alban Dudushi, në Vizion Plus, Harxhi theksoi se terreni i politikës së egër është shumë maskilist dhe se i është futur kësaj gare pikërisht për t’ju thënë atyre se ka edhe të tjerë.
“Terreni politik, ai i politikës së përditshme dhe politikës së egër është një terren shumë maskilist dhe është i zaptuar. Është ‘tokë e xanun’ deri tani. Kështu që unë jam aty për ta rimarrë atë tokën e xanun dhe për të thënë që nuk jeni vetëm ju, por ka edhe të tjerë.”
Gjatë bisedës, Harxhi përmend se ka një vizion të ri për Partinë Demokratike si për aspektin ideologjik të saj, por edhe në atë politik dhe strukturor.
“Unë kam theksuar se kam një vizion të ri për partinë. Unë synoj që tranzicioni në Shqipëri dhe në Partinë Demokratike të përfundojë në datën 13 Qershor dhe ne të nisim një kapitull të ri. Në aspektin ideologjik, sepse po ta shihni PD nuk është më një parti e djathtë siç ka qenë në fillimet e saj. Ka një skizëm shumë të madh drejt të majtës. Është një neoliberalizëm deri diku. Dhe për këtë arsye unë mendoj që ky do të jetë një fillim i ri në aspektin ideologjik, politik, strukturor, por mbi të gjitha në procesin e vendidmmarrjes brenda partisë. Dhe unë dua t’i kthej anëtarëve të Partisë Demokratike partinë. Ata janë akisonerë të barabartë me çdo politikan tjetër në PD apo drejtues të saj dhe duhet ta dinë këtë gjë që partia ju përket atyre.”
/b.h
