Teksa Armand Duka dhe struktura e tij në FSHF po organizojnë zgjedhjet për President në kundërshtim me vendimin e Gjykatës së Tiranës, kandidati Dritan Shakohoxha e ka bojkotuar Asamblenë Zgjedhore.
Shakohoxha e cilëson një farsë dhe të trukuar procesin zgjedhor, në të cilin është përgatitur gjithçka që Duka të rizgjedhet për një mandat të gjashtë. Përmes një letre një ditë më parë, Shakohoxha në shkresën e tij u ka bërë thirrje klubeve dhe FSHF-së që të mos e zhvillojnë Asamblenë Zgjedhore, pasi është e paligjshme dhe çdo vendim që do merret nuk vlen.
Ky i fundit ka nënvizuar ditët e fundit se procesi që po zhvillohet nga ana e FSHF është fals, i paligjshëm, jo statutor, jo demokratik, jo transparent dhe i manipuluar dhe ka kërkuar ripërsëritjen e procesit zgjedhor dhe respektimin korrekt të përcaktimeve përkatëse ligjore e statutore.
Krahas kandidatit kryesor përballë Dukës, në mbledhjen e sotme të Asamblesë Zgjedhore mungojnë të gjithë përfaqësuesit e bashkive të vendit, të cilat janë edhe drejtueset e klubeve në Shqipëri. Këto të fundit e kanë cilësuar garën jotransparente dhe procesin të trukuar. Përjashtim bën vetëm kryebashkiaku i Kukësit, Safet Gjici, i cili merr pjesë në Asamblenë me rezultat të paracaktuar të FSHF pasi njihet për miqësinë e ngushtë me Armando Dukën.
