Beteja për të fituar kandidimin për president nga Partia Republikane në SHBA arriti pikën më të ulët, kur dy rivalët përfshinë edhe gratë në këtë përplasje.
Gjithçka nisi kur disa mbështetës të Ted Cruz publikuan një foto të bashkëshortes së Donald Trump, modeles Melania Trump.
Fotot e saj nudo janë bërë këtu e 16 vjet më parë nga revista GQ.
“Njihuni me Melania Trump. Ajo mund të bëhet Zonja e Parë. Ose mund të mbështesni Ted Cruz”,thuhet në mesazhin e fotos.
Kjo lëvizje zemëroi Donald Trump që postoi një foto të gruas së Ted Cruz, Heidi, duke shkruar:“Gënjeshtari Ted Cruz përdori një foto të gruas sime. Kujdes gënjeshtari Ted, ose do i nxjerr të palarat gruas tënde”.
Senatori i Teksasit, Ted Cruz shkroi: “Nuk e kemi nxjerrë ne foton e gruas tënde. Donald, nëse do sulmosh Heidi-n, je më shumë frikacak nga sa mendoj”.
Edhe Heidi vetë, që punon si drejtoreshë tek Goldman Sachs, reagoi.
“Nuk jemi të shqetësuar. Unë kam një detyrë në këtë fushatë dhe ajo është të ndihmoj Ted-in të fitojë këtë garë. Mendoj se është puna më e lehtë në botë”.
