Muamar Gadafi i kishte thënë ish-kryeministrit britanik Tony Blair se xhihadistët e ISIS do të sulmonin Evropën nëse rrëzohej regjimi i tij në Libi.
Transkriptet e bisedave telefonike mes tyre, kanë vërtetuar se Gadafi e pati lajmëruar dhe Blair e dinte që Evropa do të përballej me kërcënimin e sulmeve terroriste.
Parashikimi i Gadafit u bë gjatë dy telefonatave të dëshpëruara me Blairin, në 25 shkurt 2011 – ndërkohë që Libia po përfshihej prej luftës civile.
Në telefonatën e parë, në orën 11.15 të paradites, Gadafi tha: “Ata (xhihadistët) duan të kontrollojnë Mesdheun dhe më pas, ata do të sulmojnë Europën”.
Gjatë telefonatës, e cila zgjati një gjysmë ore, Gadafi këmbënguli se po përpiqej që të mbronte Libinë nga luftëtarët e Al kaedës. Prania e al kaedas, më vonë do të zëvendësohej me ngjitjen e Shtetit islamik.
“Nuk po i luftojmë ne, janë ata që po na sulmojnë”, tha ai, “Unë dua të të them të vërtetën. Nuk është një situatë aspak e vështirë. Historia është e thjeshtë: një organizatë ka vendosur celula të fjetura në Afrikën Veriore. Quhet Organizata e Al Kaedës në Afrikën Veriore… Celulat e fjetura në Libi janë të ngjashme me celulat e fjetura në Amerikë para 11 shtatorit 2001. Ata kanë arritur të sigurojnë armë dhe të tmerrojnë njerëzit. Njerëzit nuk dalin dot nga shtëpitë e tyre… Eshtë një situatë xhihadi. Ata kanë armë dhe po terrorizojnë njerëzit në rrugë”.
Në një telefonatë të dytë të bërë katër orë më vonë, Gadafi i thotë Blairit:
“Do të më duhet të armatos njerëzit dhe të bëhem gati për luftë. Libianët do të vdesin, do i bëhet dëm i madh Mesdheut, Europës dhe të gjithë botës. Këta grupe të armatosur po përdorin situatën në Libi si justifikim – dhe ne do i luftojmë”.
Blairi i kish bërë dy thirrje telefonike Gadafit, në përpjekje për të negociuar largimin e diktatorit nga Tripoli, teksa vendi përfshihej nga lufta civile. Tre javë më vonë, një koalicion i udhëhequr nga NATO, që përfshinte edhe Britaninë, nisi sulmet bombardues që çuan në përmbysjen e Gadafit.
Diktatori u rrëzua më në fund në muajin gusht dhe u vra prej turmave në tetor. Tony Blair kishte zhvilluar një miqësi me Gadafin dhe e kishte vizituar udhëheqësin libian të paktën gjashtë herë, pasi u largua nga posti i Kryeministrit në vitin 2007.
