Polemika pas ndeshjes Poloni-Angli. Federata Angleze e Futbollit ka akuzuar mbrojtësin polak Kamil Glik për fyerje raciste ndaj Kyle Walker. Akuza e anëtarëve të federatës angleze është se fyerjet raciste janë bërë jashtë dhomës së zhveshjes në pushim të ndeshjes nga Glik, në prezencë të anëtarëve të federatës polake dhe zyrtarit të katërt. Mbrojtësi i Beneventos mohon gjithçka: “Ka pasur një luftë verbale dhe asgjë tjetër”. FIFA ka hapur një hetim.
FIFA po heton përleshjen që shpërtheu në fushë pak para përfundimit të pjesës së parë në ndeshjen e ditës së djeshme. Kamerat fokusuan Glikun ku dukej se po përpiqej të pickonte qafën e ëalker direkt para arbitrit Daniel Siebert.”Pati një zënkë, më vonë doja të shtrëngoja dorën e Walker por ai nuk pranoi. Pati një konfrontim verbal, por asgjë më shumë nuk ndodhi”, ishte deklarata e Glik.
FIFA, ndërkohë po studion rastin dhe kërkon kohë. “FIFA po analizon raportet zyrtare të ndeshjes kualifikuese të Kupës së Botës mes Polonisë dhe Anglisë. Informacioni përkatës do të vlerësohet nga organet disiplinore kompetente në mënyrë që të vendosë për hapat e ardhshëm”. Në rast se institucioni më i lartë i futbollit vendos të skualifikojë mbrojtësin, atëherë ky do të ishte një lajm i mirë për Shqipërinë pasi në tetor do të luajmë në Tiranë ndaj Polonisë./m.j
