Agim Ibraimi ka treguar në vepër se është futbollist i madh dhe se për të qenë i respektuar dhe i dashur te tifozët, nuk do të thotë vetëm të jesh futbollist i mirë në fushë. Në duelin e zhvilluar të martën në mbrëmje, ku Maqedonia për kundërshtarë kishte ish-kampionen e Botës dhe Evropës Spanjën, e në Shkup zbarkuan edhe shumë yje të futbollit botërorë, shumica e futbollistëve dëshiron që të këmbenin fanellat me ndonjë nga futbollistët më me famë.
Agim Ibraimi që në fillim të ndeshjes kishte ra dakord që të këmbejë fanellën me mesfushorin e Chelseat, Cesc Fabregas. Por, kur Agimi po bëhej gati për të hyrë në lojë, atë e thërret një tifoz i flakët i futbollistit shqiptar, Ertan Shaqiri i cili i kishte kërkuar fanellën.
Agimi në asnjë moment nuk hezitoi dhe e la anash fanellën e Fabregasit, duke gëzuar tej mase Ertanin, ndërsa në faqen sociale të Facebook kishte marrë shumë urime dhe lëvdata për veprën që kishte bërë.
