Presidenti i Federatës së Futbollit në Kosovë, Agim Ademi, ka dhënë një lajm të trishtë këtë të Hënë të 17 Shkurtit.
Numri 1 i futbollit dardan, njoftoi ndarjen nga jeta të arbitrit Rilind Berisha, në moshën 27-vjeçare. Nëpërmjet një postimi në profilin e tij, Ademi i shpreh ngushëllime familjes së Rilinds Berishës, për humbjen e njeriut të tyre të dashur.
Berisha ishte edhe futbollist i KF Rilindja, në Ligën e Dytë të futbollit në Kosovë.
Postimi i Agim Ademit:
Telegram ngushëllimi për ndarjen nga jeta të Rilind Berishës
E nderuara familje Berisha,
Të nderuar drejtues dhe staf i KF “Rilindja 1974”
Me pikëllim të thellë e morëm lajmin për ndarjen nga jeta të më të dashurit tuaj, Rilind Berisha, prandaj më lejoni që në emrin tim, KE të FFK-së, klubeve dhe gjithë komunitetit të futbollit në Kosovë t’ju shpreh ngushëllimet më të sinqerta.
Ikja e hershme nga kjo botë e një personaliteti të përkushtuar ndaj futbollit, siç ishte Rilindi, ka trishtuar të gjithë komunitetin e futbollit në Kosovë. Ju si familje duhet të gjeni forcë për ta përballuar këtë dhimbje të madhe dhe ta kujtoni atë përherë me krenari.
Rilindi ishte një futbollist i përkushtuar, por edhe një gjyqtar premtues, i cili dha kontribut të çmuar në ndarjen e drejtësisë në Ligën e Dytë.
Me disiplinën, pasionin dhe ndershmërinë e tij, ai la gjurmë të pashlyeshme dhe do të kujtohet gjithmonë si një djalosh shembullor.
Në këto momente të vështira, jemi pranë jush që ta përballoni këtë humbje të madhe, jo vetëm për familjen por edhe për komunitetin e futbollit.
I lehtë i qoftë dheu i Kosovës!
Me respekt, Agim Ademi, president i FFK-së.
