Ditën e mërkurë, Kryeministri Rama lajmëroi për përfundimin e rehabilitimit të plotë të rrugës që lidh Fushë-Arrëzin me Rrepsin.
Një segment i tillë ka një rëndësi të veçantë për banorët e Fushë Arrëzit dhe malësive të mbi Pukës, sepse për herë të parë ata do të kenë një lidhje të shpejtë dhe të sigurtë, me autostradën Tiranë-Kukës, e njëkohësisht edhe me pjesën tjetër të vendit.
Megjithatë, kjo rrugë mbart një rëndësi të veçantë sepse sipas statistikave zyrtare, mbyllja e industrive përreth në fillim të viteve 1990, izolimi gjeografik dhe ekonomik ka bërë që Fushë Arrëzi të jetë qyteti më i varfër në të gjithë vendin.
Kjo reflektohet në tabelën e çmimit mesatar të blerjes së një apartamenti në këtë zonë, të dhëna që gjenden në VKM bashkangjitur – http://www.qbz.gov.al/botime/fletore_zyrtare/2011/PDF-2011/162-2011.pdf
Si pasojë e shpopullimit të të gjithë zonës, në Fushë Arrëz mund të blihet një shtëpi me mesatarisht 79 mijë lekë të vjetra metri/katror, rreth 60 euro për metër katror. Ky është çmimi më i lirë që mund të gjesh në të gjithë Republikën ose 12 herë më lirë se sa mesatarja e kryeqytetit.
Pas Fushë-Arrëzit, çmimin më të lirë për blerjen e një apartamenti e kanë Memaliaj, Çorovoda dhe Puka./Lexo.al/b.d
