Ora e furtunës në gjyqësor po afron. EURALIUS, misioni i Bashkimit Evropian në Tiranë, që asiston autoritetet shqiptare për hartimin dhe zbatimin e Reformës në Drejtësi, paralajmëron dorëheqje masive gjyqtarësh dhe prokurorësh, për shkak të veprimit të procesit të Vetingut, ku njerëzit e drejtësisë do t’i nënshtrohen një skenari të trefishtë, për ligjshmërinë e pasurive, lidhjet me krimin dhe aftësitë profesionale. Paralajmërimi është artikuluar nga kreu i misionit të EURALIUS Rainer Deville, ndërsa ka dhënë alarmin për pamundësinë e plotësimit të vendeve vakante, për shkak të kuotave të kufizuara të Shkollës së Magjistraturës. Gjatë mbledhjes së 15 korrikut të komisionit për Reformën Zgjedhore, Rainer Devillen kërkon shtimin e kuotave, duke pohuar se në të kundërtën, Shkolla e Magjistraturës nuk do të ketë mundësi për të plotësuara vendet vakante.
80 gjyqtarë
Duke iu referuar Kosovës, Rainer Deville thotë se mund të japin dorëheqjen 80 gjyqtarë dhe prokurorë, për të evituar procesin e Vetingut. Por, numri mund të jetë edhe më i lartë. “Problemi tjetër është që shkolla e Magjistraturës në shtator fillon vetëm me 5 vende që janë kërkuar. Pra, kursi nuk do të jetë i plotë, duhet të fillojë me të paktën 25 vende, sepse, si rezultat i procesit të vlerësimit, disa njerëz, 10 njerëzit, mund të japin dorëheqjen dhe në vitet në vijim do të na duhen ata 10 njerëz që të na i plotësojnë këto vende bosh. Pra, në ligj na duhet numri 25, sepse ndryshe Shkolla e Magjistraturës dhe legjislacioni aktual nuk do të kenë mundësi të mbushin vendet bosh dhe duam të fillojmë që në shtator me këtë gjë. Kosovë 10 % dhanë dorëheqjen. Nëse marrim me mend që edhe në sistemin tonë numri i të dorëhequrve do të jetë 10 %, atëherë 10% do të largohen, pra nga 800 njerëz do të largohen 80, të cilët do të na duhet t‟i zëvendësojmë. Pra 3 x 25 do të jetë numri që do të na plotësojë kapacitetet që do të na mungojnë”, ka pohuar Deville.
Parashikimi
Neni G i projektit kushtetues parashikon që gjyqtarët dhe prokurorët mund të japin dorëheqjen nga detyra dhe në këtë rast procesi i rivlerësimit ndërpritet. Por, subjekti i rivlerësimit që dorëhiqet sipas kësaj dispozite, nuk mund të emërohet gjyqtar ose prokuror i çdo niveli, anëtar i Këshillit të Lartë Gjyqësor ose i Këshillit të Lartë të Prokurorisë, Inspektor i Lartë i Drejtësisë ose Prokuror i Përgjithshëm, për një periudhë 15-vjeçare. Ndërkaq, drafti i Vetingut parashikon që gjyqtari dhe prokurori ka të drejtë të heq dorë jo më vonë se dy muaj nga krijimi i institucioneve të rivlerësimit sipas këtij ligji. Dorëheqja paraqitet me shkrim dhe publikohet në faqen zyrtare të internetit të Komisionit. Në rastin e dorëheqjes, Komisioni merr vendim për pushimin e procedurës së rivlerësimit. Përpos dorëheqjes, një numër gjyqtarësh dhe prokurorësh pritet të përjashtohen nga sistemi i drejtësisë, ndaj numri i vendeve që do të mbetet vakant në gjykata dhe prokurori është i paparashikuar.
Shqiptarja.com
