Detaje të reja dalin nga operacionin antidrogë në Qafë-Thanë ditën e djeshme. 570 kilogramë kanabis ka qenë sasia e drogës së sekuestruar nga policia. Ndërsa burime bëjnë me dije se janë arrestuar 7 persona si të përfshirë në trafikimin e lëndës narkotike.
Emrat e të arrestuarve ende nuk bëhen me dije.
E gjithë sasia e lëndës narkotike ishte e fshehur në shasinë e një furgoni mallrash me ngjyrë të bardhë. Ky mjet transporti dyshohej se do të kalonte fillimisht në Maqedoni nëpërmjet pikës së kalimit kufitare të Qafë-Thanës, ndërsa destinacioni përfundimtar nuk dihet ende.
Pas bllokimit të furgonit të mbushur me drogë u shoqëruan për në Drejtorinë e Policisë Vendore të Elbasanit 7 persona, ndër ta dhe drejtuesi i mjetit.
Ndërkaq, mjeti me targë AA 356 NA që po transportonte më shumë se gjysëm tonelate drogë rezulton të jetë në pronësi të një biznesi nga Qarku i Fierit.
Operacioni u finalizua pas hetimeve disa mujore nga antidroga se me këtë furgon trafikoj sasi e madhe droge me destinacion një nga vendet fqinje.
Ndërkohë, pritet që Policia e Elbasanit të japë detaje rreth operacionit në një konferencë për shtyp ditën e sotme.
a.ç
