Vetëm një ditë pas miratimit të buxhetit 2017 nga ana e Kuvendit të Shqipërisë, qeveria ka ndërhyrë në bilancin e vitit aktual. Në këtë mënyrë, buxheti i këtij viti pëson ndryshimin e dytë në pak muaj.
Gjithnjë nëpërmjet një Akti Normativ, që në fakt është akt nënligjor, i cili duhet të konfirmohet nga ana e parlamentit në mënyrë që të kthehet në ligj. Ministria e Financave ka dërguar këto ditë në Këshillin e Ministrave Aktin e dytë Normativ për ndryshimet në buxhetin e vitit 2016. Në muajin korrik qeveria bëri ndryshimin e parë të buxhetit.
Ndërkohë, vitin e kaluar, ajo vuri dorë, madje, tri herë në Buxhetin e Shtetit, të trija herët nëpërmjet akteve normative, për të mos pritur afatet që sjell shqyrtimi nëpër komisionet parlamentare. Sipas treguesve fiskalë të atij Akti të këtij viti, u ul plani i të ardhurave me -1.1%, ose me një reduktim me vlerë në 4.4 miliardë lekë, ndërsa shpenzimet buxhetore janë shkurtuar me 3.1 miliardë lekë ose 0.7%. Por një gjë e tillë nuk parashikohet në Aktin aktual. Pra, treguesit kryesorë të buxhetit, si niveli i të ardhurave, ai i shpenzimeve dhe defiçiti buxhetor, nuk ndryshojnë.
Ndryshimet kryesore pra kanë të bëjnë me shpenzimet e fundit të vitit, që kanë mbetur pa u realizuar nga dikastere të ndryshme, apo janë në përbërje të rezervës buxhetore. Kjo bëhet edhe për të mbuluar nga buxheti faturën në vlerë 4 miliardë lekë, ose rreth 30 milionë euro, që u premtua për të shpëblyer me 6 mijë lekë çdo pensionist, në qytet e fshat, si dhe me 2 mijë lekë çdo person me aftësi të kufizuar, apo familje në ndihmë ekonomike.
Shpërblimet nuk do të financohen me borxh, sikurse është kritikuar nga ana e opozitës kohët e fundit, por, sipas qeverisë, paratë janë siguruar nga kursimet në fondin e pagave dhe disa zëra të tjerë të shpenzimeve. Për këtë, kërkohet nja akt me fuqinë e ligjit për të ndryshuar destinacionin e fondeve.
Ndryshimi i dytë më i rëndësishëm ka të bëjë me shlyerjen e 3.6 miliardë lekëve borxhe të prapambetura ndaj privatëve në sektorin e ujësjellësit dhe atë të infrastrukturës rrugore. Edhe në këtë rast kemi të bëjmë me një rishpërndarje fondesh, pasi këto para do të merren nga ato investimet, të cilat kanë patur një ecuri të ngadaltë realizimi.
Veç shlyerjes së borxheve të prapambetura, qeveria i shton 3.3 miliardë lekë ose 25 milionë euro pushtetit vendor përmes Fondit të Zhvillimit të Rajoneve. Gjithsahtu edhe ky ndryshim është një rishpëndarje fondesh. Paratë, të cilat do të financojnë ndërtimin e rrugëve rurale apo shkollave të reja, janë siguruar nga kursimet në transfertën e energjisë, si dhe nga ndihma ekonomike.
Drejtoria e Emergjencave Civile përfiton, ndërkohë, nëpërmjet këtij rishikimi buxhetor, një shtesë prej 450 milionë lekësh për shlyerjen e dëmshpërblimeve për të goditurit nga fatkeqësitë natyre, kryesisht përmbytjet, të akumuluara gjatë periudhës 2013-2016, ndërsa 142 milionë lekë të tjera shkojnë për detyrimet e mirëmbajtjes së rrugëve.
