Me një deklaratë shokuese duke pasqyruar dhe realitetin e pandemisë, presidentja e Komisionit Evropian, Ursula von der Leyen u shpreh sot se njerëzit e moshuar do të duhet të qëndrojnë nëpër shtëpitë e tyre deri në fund të këtij viti dhe nuk duhet të lejohet të dalin shpejt. “Është çështje jete apo vdekjeje”, tha ajo.
Kjo deklaratë shpreh më së miri shqetësimin e autoriteteve evropiane për përballimin e pandemisë së koronavirusit. Sipas Von der Leyen, shtetet evropiane duhet të marrin masa izolimi të gjatë për personat që janë më të rrezikuar, pasi kemi të bëjmë me të vetmen masë që jep garanci se do të shpëtohen miliona jetë njerëzish.
Vetëm kështu, theksoi Von der Leyen, mund të shmanget rreziku i një përhapjeje masive të pandemisë, nga e cila më të rrezikuar janë të moshuarit dhe personat me sëmundje kronike.
“Duhet të jemi të displinuar dhe të kemi durim” tha presidentja e KE, duke shprehur shpresën se ndonjë nga laboratorët evropianë, që po punojnë intensivisht, do të jetë në gjendje të gjejë vaksinën për Covid-19.
Von der Leyen këshilloi qytetarët evropianë që të heqin dorë apo të anulojnë pushime të prenotuara më parë për sezonin veror. Ajo shtoi se tani për tani nuk mund të bëhet asnjë parashikim i besueshëm se si do të jetë situata gjatë muajve korrik e gusht.
Ndërkohë, në gjithë Evropën numri i viktimave tani ka arritur në 75 mijë. Dhe në Spanjë është shënuar sërish rritje e të vdekurve: 619 viktima të koronavirusit në 24 orët e fundit.
