Francezët që jetojnë jashtë vendit do të votojnë në mënyrë tradicionale për zgjedhjet legjislative të qershorit 2017 dhe jo nëpërmjet votimit elektronik, si masë parandaluese ndaj një sulmi të mundshëm kibernetik, njoftoi sot Ministria franceze e Punëve të Jashtme.
“Ky vendim u mor mbi bazën e rekomandimeve të ekspertëve të Agjencisë Kombëtare mbi Sigurinë e Sistemeve Informatike (ANSSI) dhe duke pasur parasysh nivelin jashtëzakonisht të lartë të kërcënimit nga sulmet kibernetike që mund të prekin zhvillimin e votimit elektronik”, thuhet në një komunikatë të Ministrisë franceze të Punëve të Jashtme.
“Për shkak të këtij konteksti, u pa e arsyeshme që të mos merret asnjë rrezik i ndonjë natyre që mund të prek votimin legjislativ për francezët që jetojnë jashtë vendit”, vazhdon ky tekst.
Votimi elektronik për francezët që jetojnë jashtë vendit kishte qenë i mundur për herë të parë në vitin 2012 dhe u zhvillua pa asnjë incident./a.m.
