Presidenti i EODY, Panagiotis Arkoumaneas ka ngritur shqetësimin për përhapjen e mutacionit Delta në Greqi dhe në të gjithë Europën.
“Të vaksinuarit nuk janë në rrezik. Mutacioni i ri ngre shqetësime për të ardhmen. Nëse është e nevojshme ne do të kthehemi në një bllokim lokal. Mënyra për ta shmangur atë është vaksina për t’i dhënë fund pandemisë dhe jo për të kthyer bllokimet e përqendruara”, deklaroi ai.
Ai shtoi se nga 17 muaj betejë me pandeminë është mësuar se çdo gjë mund të ndodhë dhe vendimet mund të merren vetëm në bazë të të dhënave aktuale. “Me të dhënat e reja ju do të merrni vendime të reja”, theksoi ai.
Duke iu referuar modeleve në Europë, Arkoumaneas u shpreh se mutacioni Delta mund të jetë dominues në muajin gusht në vendet e tjera dhe ndoshta edhe në Greqi.
“Tani për tani modelet tregojnë se në gusht mutacioni Delta do të jetë lloji dominues në të gjithë Europën dhe ndoshta në vendin tonë. Zgjidhja janë vaksinat. Ne të gjithë duhet të vaksinohemi së pari. Së dyti, vaksinat janë të sigurta.
Ka pasur miliarda doza në të gjithë botën dhe miliona në vendin tonë me komplikime pafundësisht të vogla. Së treti, të pa vaksinuarit dhe zonat me mbulim të ulët vaksinimi ka shumë të ngjarë, të përballen me probleme”, u shpreh ai.
Tashmë autoritetet po mendojnë të rrisin shkallën e vaksinimit në zonën e Kretës ku deri më tani janë zbuluar të paktën 20 raste me mutacionin Delta.
g.kosovari
