Fryma e Re Demokratike ka mbyllur fushatën e saj elektorale për zgjedhjet vendore në një takim elektoral të mbajtur ku i ftuar ishte edhe kandidati i mazhorancës për bashkinë e Tiranës Erion Veliaj.
Në fjalën e tij, kreu i kësaj partie, Bamir Topi tha se FRD bëri zgjedhjen e duhur kur pranoi bashkimin me koalicionin e majtë.
“Zoti Rama iu drejtua FRD-së për një koalicion për zgjedhjet vendore dhe pas një analize dhe vendim-marrjeje, FRD iu bashkua këtij koalicioni, sepse në krye të sloganit tonë është fryma e re demokratike për shtetin dhe qytetarin”, tha Topi.
Ai u shpreh se, ky bashkim do t’i shërbejë formimit të Shqipërinë europiane, që ndër vite, sipas tij, mbeti mirazh. Ndërkaq Topi vlerësoi figurën e Erion Veliajt si kandidatin e duhur për kryebashkiak të Tiranës.
“Vlerësoj rolin dhe pozicionin e FRD-së, që do të jetë për herë të parë pjesëtare e Këshillit Bashkiak të Tiranës. Vlerësoj maksimalisht edhe zotin Veliaj, duke i thënë se ti je lider i profilit europian dhe së bashku me kolegët, një prej të cilëve do të jetë nga FRD, synimet për një gjeneratë moderne do të jenë të realizuara”, ka thënë Topi.
