Humbja e thellë e Shqipërisë me Francën mbrëmjen e djeshme la një shije të keqe te sportdashësit jo vetëm për rezultatin por edhe për lojën e dobët të kombëtares sonë.
Gazeta franceze “France Football” ka dhënë notat e performancës për ekipin ku më e larta ka qenë për Baren ndërsa më dobët është vlerësuar Hysaj.
“Në një mbrojtje shqiptare të rrethuar në çdo cep, ai ishte personi që vuajti më shumë dhe me diferencë të thellë. Shumë pak i frymëzuar në vendosjen e tij, në vështirësi të mëdha në duele. Dukej i ngathët për të përballuar kundërshtarët e shpejtë. Logjikisht ai fuste ujë nga të gjitha anët. Qoftë kundër Komanit që e la në vend me një driblim apo dhe pas pushimit me Grizmanin. Një ndeshje që do të mbetet disa javë në kokën e tij”, shkruan francezja “France Football”.
Me notën 3 u vlerësuan Strakohsha, Hysaj, Roshi dhe Balaj. Me notën 4 Ismajli, Xhimshiti, Mavraj, Ramadani, Abrashi dhe Uzuni. Ndërsa Keidi Bare ishte i vetmi i vlerësuar me notën 5.
“Çdo lojtar shqiptar do të donte të luante ndaj Francës. Ishte një rezultat negativ, por mbi të gjitha dola nga fusha duke i dhënë të gjitha ç’kisha. I surprizuar si titullar? Po, sepse gjatë javës nuk isha në formacion, por sot trajneri më tha se do të jem. Jam gati gjithmonë. Ata kishin gjithë lojës kontrollin dhe kjo ishte vështirësi. Futeshin nga brenda dhe nga jashtë dhe na bënë shumë vështirësi në mbrojtje” tha Bare në fund të ndeshjes.
