Franca mundet që në “në çdo moment” të humbasë kontrollin mbi situatën me pandeminë, paralajmëroi Këshilli Shkencor për COVID-19 i qeverisë franceze.
Të dhënat zyrtare treguan rritje të numrit të pacientëve që janë duke u trajtuar në kujdes intensiv.
Sipas një udhëzimi të përgatitur nga ky Këshill “virusi kohët e fundit po qarkullon më mënyrë më aktive, pas lehtësimit të masave kundër pandemisë”.
“Në afat të shkurtër, mbajtja e kontrollit është kryesisht në duart e qytetarëve”, thanë zyrtarët shëndetësorë, duke paralajmëruar një përkeqësim të mundshëm të situatës gjatë stinës së vjeshtës.
Presidenti i Francës, Emmanuel Macron, u bëri thirrje qytetarëve që të mbetet “vigjilent” dhe të vazhdojnë të zbatojnë masat mbrojtëse kundër përhapjes së virusit, siç janë: mbajtja e maskave, distanca fizike dhe larja e rregullt e duarve.
Në Francë deri më tani janë regjistruar mbi 30 mijë viktima nga sëmundja COVID-19, që e shkakton koronavirusi i ri.
Vendi, regjistroi mijëra raste të të infektuarve javën e kaluar, duke bërë që disa qytete dhe rajone të imponojnë kufizime.
