Fraksion Plusi që u shkëput nga Vetëvendosje për shkak të pakënaqësive e konsideron opozitën si të pashpresë për ta ndryshuar gjendjen.
Ajnishahe Halimi nga Fraksion Plus thotë se opozita ka abuzuar në emër të Asociacionit dhe Demarkacionit, duke sjellë vetëm dëme përmes bllokadës institucionale dhe ultimatumeve, të mbështetur me vezë e gaz, e deri tek metodat vandaliste me gurë e molotov.
“Pas dështimit të opozitës me sektën skizmatike-anarkiste të VV në ballë të saj, Fraksion +, gjendjen politike në vend e sheh si shumë apatike, ndërsa opozitën të pashpresë për të qenë faktor ndryshimi pozitiv në të ardhmen.
Subjektet e kësaj opozite si duket nuk mësuan nga dështimet nga koha e VLAN-it, kur për 6 muaj e mbajtën peng Kosovën, me gjithë shumicën parlamentare në koalicion.
Së fundi, ky front opozitar, në vend të debatit demokratik në interes të vendit, abuzoi në emër të kauzave kundër Asociacionit dhe Demarkacionit, duke sjellë vetëm dëme përmes bllokadës institucionale dhe ultimatumeve, të mbështetur me vezë e gaz, e deri tek metodat vandaliste me gurë e mollotov, me të cilat në fakt, nuk i mbyllet, por i hapet edhe më shumë rruga ndërhyrjeve të Serbisë në Kosovë”, thotë Halimi për Indeksonline.
Halimi i konsideron si metoda të dëmshme dhe jo dinjitoze për Kosovën sjelljet e opozitës. “Me këto metoda jo dinjitoze dhe të dëmshme për Kosovën, me veprimet e dhunshme dhe bllokuese të punës së Kuvendit, më pastaj edhe me bojkotin e këtij institucioni, deputetët aktual të opozitës e kanë të humbur legjitimitetin qytetar.
Kjo opozitë pos anarkisë, frenimit të zhvillimit institucional dhe kaosit të dëmshëm, deri më sot nuk i solli asgjë të mirë Kosovës. Fraksion + konsideron se qytetarët Kosovës do t’i braktisin një herë e përgjithmonë deputetët e politikanët e këtillë, të padobishëm për Republikën”, thotë Halimi.
