Nuk është hera e parë që dizenjuesi italian Pierpaolo Lazzarini bën të flitet për veten dhe konceptet futuristike. Ca kohë më parë krijoi “Jet capsule”, një jaht në miniaturë, me nëntë vende, 7.5 metra i gjatë e 3.5 i gjerë.
Tani dizenjuesi nga Viterbo është rikthyer me UFO 2.0 (unidentified floating object), një strukturë pluskuese me sipërfaqe 314 metra katrorë, ndërtuar me fibra e xham, me diametër 20 metra.
Shtëpia luksoze pluskuese duket si e ardhur nga filmat me fantashkencë. Ka formën e diskut fluturues, me zonën qendrore që ndahet në tre kate: Zona ditore (80 m2) me kuzhinën, depon e banjon; zona nënujore (50 m2), ku është një dhomë gjumi dhe një banjo e madh; platforma në katin e sipërm.
“Mund të jetë edhe resort, hotel, restorant, palestër, vilë që vendoset ku të duash, jo thjesht shtëpi”, shpjegon Lazzarini.
16 bateri ushqejnë dy motorët elektrikë, të vendosur poshtë. Shpejtësia e shtëpisë pluskuese shkon rreth 9 nyje (16.6 km/orë). Kostoja? Jo më pak se 1 milion euro.
Ideuesi synon të nisë një fushatë për mbledhje fondesh në Kickstarter për të realizuar projektin e tij.
Dorëzimi i njësisë së parë është parashikuar për në fillim të vitit 2018.
CdS/d.i.
