Një zjarr i madh ka rënë në zonën e ish-magazinave në rrugën “Siri Kodra” në Tiranë.
Burime nga policia e Tiranës konfirmojnë se nga zjarri nuk ka persona të lënduar, por vetëm dëme materiale. Ndërsa rrezikohen dy banesa që ndodhen pranë.
Flakët janë të mëdha ndërsa shtëllungat e tymit janë përhapur thuajse në gjithë kryeqytetin.
Policia dhe zjarrfikëset u njoftuan për rënien e zjarrit në magazina tek ish-frigoriferi rreth orës 19:15.
Në zonë kanë mbërritur forcat e policisë, 6 zjarrfikëse, autoambulanca dhe dhjetëra efektivë të Policisë së Tiranës. Ndërkohë kërkohet ndihmë nga repartet e zjarrfikësve në Durrës dhe Fier për shuarjen e flakëve në Tiranë
Nuk dihen ende rrethanat e zjarrit, por paraprakisht policia dyshon se shkak i ngjarjes ka qenë një shkëndije elektrike tek ish-frigoriferi.
Për momentin qarkullimi në këtë zonë është bllokuar për të lejuar lëvizjen e autoboteve me ujë por edhe për të evituar ndonjë rrezik të mundshëm. Po kështu po evakuohen edhe banorët pasi flakët shkojnë në 30 metra. Pamjet nga vendi i ngjarjes, ku duken përmasat e frikshme të zjarrit.
Njoftimi i policisë për ngjarjen:
Tiranë
Me datë 02.04.2018, rreth orës 19:30, në rrugën “Siri Kodra”, në një magazinë ka rënë zjarr.
Menjëher në vendngjarje kanë shkuar shërbimet e Policisë dhe Zjarrëfikësja ku po punohet për fikjen e zjarrit dhe evakuimin i banorëve të ndodhur në banesat pranë. Si pasojë e zjarrit ka vetëm dëme materiale. Grupi hetimor ndodhet në vendngjarje për zbardhjen e plotë të shkaqeve dhe rrethanave të zjarrit.
a.ç
