Teatri i Hapur i Tiranës në Parkun e Liqenit Artificial ka nisur të marrë formë. Bashkia e Tiranës nëpërmjet Agjencisë së Parqeve dhe e Rekreacionit në Tiranë ka vijuar punën për rehabilitimin e plotë të atij që njihet nga të gjithë si Amfiteatri i Tiranës dhe që shumë shpejt do të funksionojë si një Teatër i Hapur për të gjithë artistët.
Siç edhe shihet nga fotot puna ka vijuar me intensitet dhe deri më tani është bërë e mundur rindërtimi i skenës dhe shumicës së karrigeve prej betoni, ndërsa po punohet me dhomat e reja të zhveshjes si dhe detajet e tjera që do të pasurojnë këtë skenë të re për artin.
“Vijon puna për rehabilitimin, rindërtimin në shumë nga komponentët të Teatrit të Hapur në Parkun e Madh. Instalime të reja, hapësirë për koncerte me orkestër para skenës, shkarkime e impiante ndriçimi, rrethim e ambiente sanitare të reja, finitura më të durueshme e më të bukura, rigjenerim gjelbërimi e rrugicash”, thuhet në faqen zyrtare të Agjencisë së Parqeve dhe Rekreacionit në rrjetin social “Facebook”.
Të shumtë janë ata që frekuentojnë këtë zonë gjatë gjithë stinëve të vitit, ndaj rikthimi në identitet do t’i kthejë qytetarëve që kalojnë orët e tyre në këtë zonë, jo vetëm një ambient modern edukimi e argëtimi, por edhe një skenë teatrore më shumë.
