Protestës së studentëve para Ministrisë së Arsimit nuk i kanë shpëtuar militantët e partive politike. Report Tv sjell pamjet e disa prej anëtarëve të forumeve politike që i janë bashkuar protestës në Tiranë, por edhe universitetet në rrethe. Kristina Tonaj, anëtare e FRPD Shkodër është njëra prej tyre.
Por, pas lajmit Kristina Tonaj ka reaguar duke pranuar që është simpatizante e PD, por që në protestë po vepron sipas bindje personale dhe jo me urdhër të PD. “Unë jam mbështetëse e Partisë Demokratike, por si shumë të tjerë kam rezervat e mia sidomos për sa i përket qasjes së saj ndaj Ligjit “ Për Arsimin e Lartë”. Nuk kam arritur në ato nivele të larta partiake sa të marr komanda direkte nga Lulzim Basha dhe kam qenë ndër ato që ditët e fundit kanë bërë dhjetëra deklarata kundra politizimit të kësaj proteste”, thotë ajo.
Sekretari i Burimeve Njerëzore për LRI, Gaetano Doçi i njohur për mediat si ‘Bodyguard-i’ Monikës (lexo këtu) është një tjetër aktivist që është fotografuar në protestë, po ashtu edhe kryetari i LRI-së në Qarkun Lezhë, Andrea Gjini, por edhe militantë të tjerë të kësaj force. Protestës i është bashkuar edhe një tjetër militant nga Partia Demokratike. Ai është ish – inspektori i tatimeve gjatë kohës që qeveriste Partia Demokratike, Vilson Mahmutaj. Emri i këtij të fundit është referuar në Prokurori nga Komisioni Qendror i Zgjedhjeve me akuzën e manipulimit të votave në favor të PD-së, gjatë procesit të numërimit.
Në protestë është fotografuar edhe një tjetër eksponent i PD-së. Bëhet fjalë për kryetarin e PD në degën e Paskuqanit, Petrit Fejzullahu, ish-financier në ISKSH. Deputeti i Partisë Socialiste Pjerin Ndreu përmes një statusi në Facebook denoncon se militantë të PD nga Bathorja i janë bashkuar protestës së studentëve. Ai publikon foton e një personi në protestë, që thotë se është kryeplaku i lagjes 5 Bathore. “Proteste studentesh apo militantesh ? Mos besoni po deshet, kryeplaku i lagjes 5 Bathore, Shyqyri Tershalla, militant i PD ne mes te studenteve!”, shkruan Ndreu.
Në protestën e 11-dhjetorit, protesta e studentëve të universitetit “Aleksandër Moisiu” në qytetin e Durrësit duket se është marrë në dorëzim nga drejtuesit e PD në këtë qytet. Në krye të protestës së studentëve është Jola Hysaj, ish-lektore në këtë universitet, aktiviste e PD në Durrës. Shqiptarja.com ka mësuar se PD ka paguar edhe biletën e studentëve që janë nisur nga Durrësi drejt Tiranës.
Ndërkohë që në Tiranë para ministrisë së Arsimit protestës i është bashkuar edhe një tjetër militant i PD-së, Gentian Gjonaj. Ai ka postuar foton e tij nga protesta e studentëve, ndërsa është i njohur për pjesëmarrjen në tubimet e PD te çadra vitin e kaluar, por edhe te Unaza e Re këtë vit. Prej ditësh PD dhe LSI janë mobilizuar në protestën e studentëve. Përditë, militantë dhe anëtarë të dy partive janë shfaqur në protestë nën ‘jelekun’ e studentit protestues.
Militantët e PD- LSI
a.meta
