Para festimit jubilar të 70-vjetorit të krijimit të klubit, lajmi i madh për Partizanin ishte fillimi i punimeve për shtëpinë e re të “demave”, e cila, përveç akademisë, fushave stërvitore, hotelit të klubit dhe shumë ambienteve të tjera, do të përmbante edhe një stadium me kapacitet mbi 5 vende.
Gjatë kësaj periudhe pune, në shtëpinë e të kuqve projekti fillestar ka pësuar ndryshime, pasi kapaciteti i stadiumit u rrit me 500 vende, nga 4500 të deklaruara në start, si dhe tribuna përkarshi do të lihet e hapur, në mënyrë që të shtohet sërish numri i vendeve. Punimet në kompleks janë shoqëruar me luhatje, pasi në periudha të veçanta ritmi ka qenë i ulët.
Aktualisht po punohet me tre turne dhe gjithë kapaciteti është përqendruar te ndërtimi i stadiumit të ri. Për momentin ka mbaruar bazamenti i fushës, ku janë shtruar edhe disa shtresa me materiale të ngurta, si çakëll dhe zhavorr. Por, një cep i fushës mbetet i papërfunduar, pasi më parë pritet të shkulet nga thellësia e tokës një depozitë e madhe.
Për momentin ka mbaruar edhe bazamenti i tribunës qendrore, si dhe ka nisur ngritja e kolonave të këtij sektori kryesor, i cili, në përfundim të punimeve, do të jetë i mbuluar. Sipas projektuesve dhe firmës zbatuese të punimeve në terren, flitet se stadiumi i ri i Partizanit do të jetë gati në pranverën e 2017-ës.
Ndërtimet e këtij stadiumi po kryhen sipas parametrave dhe udhëzimeve të UEFA-s, gjë e cila lë të kuptohet se ky impiant do të jetë i licencuar edhe për ndeshjet ndërkombëtare të “demave” deri në fazën e grupeve të Kupave të Europës. Mësohet se është rënë dakord që stadiumi i ri i Partizanit të dorëzohet me kapacitet prej 6 mijë vendesh, që do të thotë 1500 vende më shumë se projekti fillestar./Panorama/a.m.
