Ammar Hammashos, është një nga mijëra e mijëra sirianë, që humbi çdo gjë në ”Pranverën arabe”, që nisi në marsin e 2011-s si një protestë paqësore kundër presidentit sirian Bashar al-Assad dhe u shndërrua në një luftë të vërtetë civile.
Shtëpia e tij është kthyer në gërmadhë, lodrat e fëmijëve janë mbuluar nga pluhuri dhe gjaku i djalit 8-vjeçar, që humbi jetën gjatë një sulmi me bombë.
Në vitin 2016-ën, Ammar do të merrte vendimin më të vështirë të jetës, të shkëputej nga familja drejt një të ardhmeje të pasigurtë me shpresën se një ditë do t’ia dilte të tërhiqte pas edhe pjesëtarët e mbetur ende në Siri, shkruan tesheshi.com.
Ammar e dinte që ata ishin gjallë dhe një ditë do t’i shihte. Kur mori vesh se në kampin e Kokkinotrimithias të Qipros ishin strehuar 250 refugjatë, shpresonte se do të takonte familjen e tij.
Policia i dha vetëm 30 minuta kohë për të kontrolluar për të afërmit e tij, ndërsa arriti të gjente 4 fëmijët e mitur dhe bashkëshorten.
Të miturit 7,5,4 vjeç dhe 18 muajsh, kishin udhëtuar me nënën e tyre në det të hapur për 24 orë. Më pas kishin zbarkuar nga anija në Mersin, në Turqi dhe kishin mbërritur në Qipro.
Fotot e tij teksa puthte dhe përqafonte fëmijët përmes një rrjetë teli kanë bërë xhiron e botës. Ammar i tha Reuters se “nuk kemi ku të qëndrojmë. Djali ynë i madh humbi jetën gjatë bombardimeve. Kur të mbarojë lufta do të kthehemi në shtëpinë tonë. Është vendi ynë”.
ma.me
