Një grua shqiptare, nënë e 3 fëmijëve, ka humbur jetën në një aksident tragjik në Itali, mbrëmjen e djeshme. Elvira Hoxhaj u përplas nga një automjet Ford Focus që drejtohej nga një burrë, baba i dy fëmijëve, i cili më tej është larguar nga vendi i ngjarjes duke e lënë shqiptaren të vdekur në rrugë. Policia italiane ka identifikuar autorin e këtij aksidenti të rëndë, Eugenio Vava 43 vjeç i cili edhe pse u ndalua 4 orë pas aksidentit rezultoi të ishte nën efektin e alkoolit në nivel mbi normën e lejuar për të drejtuar makinë. Burri, i cili punonte në Austri, pas përplasjes tragjike është larguar menjëherë nga vendi i ngjarjes pa i dhënë ndihmë shqiptares.
Por në vendngjarje mbeti targa e makinës së tij Ford Focus, dhe duke bërë të mundur identifikimin e tij, policia e arrestoi Eugenio Vavën rreth orës 23:00 kur ai u kthye në banesën e tij, ndërkohë që aksidenti ndodhi rreth orës 19.00.
Elvira Hoxha jetonte me bashkëshortin dhe tre fëmijët e saj, një djalë 10-vjeçar, një vajzë e moshës 11 vjeç dhe tjetra 16. Mediat italiane shkruajnë se me gjasa shqiptarja kishte dalë për të shkuar në supermarket kur trupi i saj është shtypur nga makina e cila doli jashtë kontrollit. Policia ka nisur hetimet në lidhje me aksidentin e ndodhur në një rrugën pa ndriçim, ndërsa italiani i arrestuar akuzohet për “vrasje në rrugë”, siç i cilëson kodi penal italian, aksidentet kur shoferi largohet nga vendi i ngjarjes. /Përshtati nga mediat italiane – Gazeta Express/ma.me
