Forcat e Ndërhyrjes së Shpejtë kanë tashmë ambiente të reja për mësimin dhe stërvitjen, me një investim mbi 6 milionë euro për transformimin e godinës.
Ministri i Punëve të Brendshme Saimir Tahiri i cili mori pjesë në ceremoninë e inaugurimit të ambienteve të reja, tha në një prononcim për mediat se ishte sakrificë për FNSH-në të ushtronte detyrën në kushte skandaloze.
“Me këtë investim mbi 6 mln euro ne sot përurojmë mjediset ndoshta më moderne të forcave speciale në Shqipëri por edhe në rajon”, tha Tahiri. Sipas tij, krijimi i komoditeve të tilla është përpjekje për ta bërë policinë më të mirë dhe më të aftë.
“Çdo akuzë, çdo baltë që hidhet mbi ne, është konfirmim i punës së mirë që bëjnë punonjësit e policisë se shtetit dhe gjithçka kemi bërë sot i vëmë emër: nxitja e nevojshme për të vazhduar para me reformën, me rritjen e besimit, infrastrukturë, kjo është policia që duam. Unë jam mësuar me akuzat e përditshme dhe nuk më bëjnë përshtypje. Jam i vendosur për të vazhduar punën dhe për të bërë detyrën. Qentë le të lehin, FNSH ecën përpara”, u shpreh ministri.
Ndërkohë duke ju drejtuar efektivëve të FNSH-së, Tahiri tha: “Jeni pjesë e elitës së policisë së Shtetit. Është në dorën tuaj të bëni gjithçka që qytetarët të ndërtojnë besimin. Ne kemi përgjegjësinë që punën tuaj ta bëjmë më komode”.
Edhe deputeti i Komisionit të Sigurisë Piro Lutaj, i pranishëm në këtë ceremoni, tha se ambientet e reja ku janë sistemuar Forcat e Ndërhyrjes së Shpejtë në Tiranë, tregojnë se vëmendja e qeverisë ndaj tyre vazhdon. “Ju meritoni shumë. Balta që hidhet ndaj jush të mbetet në gojën dhe fytyrën e atyre që hedhin baltë gjithmonë”, – u shpreh deputeti, duke ju referuar akuzave të opozitës për policinë. /Express/ a.m.
