Një pallat 5-katesh, i ndërtuar në një zonë kodrinore në Gjirokastër, rrezikon të shembet për shkak të rrëshqitjes së dheut. Banorët e 15 familjeve në pallatin që ndodhet në lagjen “Punëtori”, janë alarmuar pasi nga lëvizja e dheut kanë ndjerë tronditje dhe nga frika kanë braktisur banesat e tyre.
Ende nuk dihet se nga ka ardhur rrëshqitja, por sipas vetë banorëve shkak është bërë një ndërhyrje rreth 50 metra poshtë kodrës ku ndodhet pallati.
Marjana Kurkari është pronarja e ndërtesës 2-katëshe, e cila për të penguar erozionin kishte nisur punimet për ndërtimin e një muri dhe kjo dyshohet se mund të ketë shkaktuar rrëshqitje të dheut të llojit shtuf. Nga rrëshqitja është shkaktuar një çarje me gjatësi rreth 100 metra. Banorët lajmëruan forcat e policisë, ndërsa e pranishme në vendin e ngjarjes ka qenë edhe Policia Bashkiake për të analizuar atë që kishte ndodhur.
Pas verifikimeve të para, 42-vjeçarja që po kryen punime pranë pallatit 5-katesh u shoqërua në Komisariat për t’u marrë në pyetje. Në bazë të deklarimit të saj, por edhe nga Bashkia Gjirokastër, mësohet se Marjan Kurkari nuk kishte marrë leje për një ndërhyrje të tillë. Sipas 42-vjeçares, ajo nuk ka marrë leje nga Bashkia e Gjirokastrës, pasi bëhej fjalë për hapjen e një kanali.
Kësisoj, ajo ka ndërhyrë përmes disa punëtorëve të krahut për të hapur një kanal që mos të lejonte dëmtimin e banesës së saj nga terreni shtufor.
Policia e Gjirokastrës ende nuk ka ndërmarrë ndonjë masë ndalimi ndaj saj, por është mjaftuar me marrjen e masave duke marrë në pyetje edhe përfaqësues të Bashkisë së Gjirokastrës dhe Inspektoratit Ndërtimor lokal.
Nga ana tjetër, banorët e pallatit kërkojnë marrjen e masave nga bashkia dhe organet e tjera vendore për parandalimin e shembjes së pallatit.
Ndërkaq, drejtori i Ndërmarrjes Gjeologjike në Gjirokastër, Cano Norra, shprehet se rreziku për shembjen e pallatit 5- katesh është evident pasi terreni shtufor, në kulm të të cilit është ndërtuar pallati, për nga përbërja e vet e brishtë nuk duhet të jetë objekt ndërtimi apo ndërhyrjeje dhe sipas tij ndërhyrja e fundit për hapjen e një kanali ka krijuar çarje të mëdha në kodrën ku pallati parafabrikat është ndërtuar gjatë periudhës së komunizmit. /panorama
ma.me
