Foto të shkrepura në 11 Shtatorin e vitit 2001, pas sulmeve terroriste që shkatërruan Qendrën Botërore të Tregtisë në Nju Jork dhe lanë rreth 3 mijë viktima, janë bere publike së fundi, ku tregohet reagimi i administratës së atëhershme të ish-presidentit Bush.
Fotot tregojnë presidentin George W. Bush, zëvendëspresidentin Dick Cheney, bashkëshortet e tyre Laura dhe Lynne, Këshilltaren e Sigurisë Kombëtare, Condoleezza Rice, drejtorin e CIAs George Tenet, si dhe zyrtarë të tjerë të lartë.
Fotot e shkrepura në atë kohë nga stafi i administratës, janë lëshuar së fundi pas një kërkese për informacion nga Neirouz Hanna, përfaqësuese e “Kirk Documentary Group”.
Thuajse në të gjitha fotot duket shqetësimi i thellë i zyrtarëve amerikanë të asaj kohe, ndërsa në njërën nga fotot zëvendëspresidenti, Cheney ndjek ngjarjet në televizor me këmbët mbi tavolinë.
Ky është seti i dytë fotografik i lëshuar pas kërkesës së bërë nga Hanna. Fotot e para u lëshuan muajin e kaluar, të cilat përmbanin qindra prapaskena dhe fotografi personale të Dick Cheney dhe George W. Bush.
