Tifozët Kuq e Zi janë ata që sakrifikojnë më shumë se kushdo tjetër për të ndjekur e përkrahur në çdo stadium Kombëtaren duke shpenzuar jo pak nga xhepi i tyre. Secilit prej tyre i duhet një buxhet i majmë për t’u akomoduar në hotel, për ushqim, për biletën apo për shpenzimet e ndryshme gjatë ditës së ndeshjes.
Sakrificat e Tifozave Kuq e Zi (Të Suedisë) gjatë eliminatoreve ishin të mëdha. Ata udhëtuan në grup rreth 40 persona drejt Moldavisë për të mbështetur Kombëtaren fillimisht me avion dhe më pas nga Rumania me furgona.
Si duket, jo gjithçka ka shkuar në mënyrë perfekte. Automjetet e shërbimit të transportit kanë pësuar defekte, çka ka sjellë edhe vonesa. Më pas, problemet nuk munguan as në Moldavi.
Kontrolle të imtësishme dhe sekuestro të gjitha simboleve të Shqipërisë pa asnjë shpjegim, acaruan situatën. Pas një periudhe të caktuar kohore, tifozët janë lejuar të drejtohen drejt stadiumit “Zimbru” në Moldavi dhe vetëm pak minuta para fillimit të ndeshjes kanë arritur të ngjiten në tribunë.
Kësaj radhe nga Stokholmi, Malmoe ,Goteborgu ishin bërë bashkë emigrantë nga Peqini, Librazhdi, Kavaja, Korça, Erseka, Pogradeci, Prishtina, Peja e Tetova. Në fundi ia vlejti, pasi Shqipëria u kualifikua në Euro 2024./m.j
