Turqia ka inauguruar të martën tunelin e parë që lidh Evropën me Azinë me rrugë automobilistike. Tuneli “Avrasya” përbëhet nga dy shtresa, një për vajtje dhe një për ardhje.
Mediet turke kanë listuar shtatë gjëra që duhet të dini për këtë tunel.
Gjatësia dhe thellësia
I gjithë projekti që lidh Evropën me Azinë është 14,6 km i gjatë, duke përfshirë tunelin 5,4 km i cili kalon nën det. Pika më e thellë që arrin tuneli është 106 metra nën nivelin e detit.
Nga kalon?
Tuneli “Avrasya” nis në bregun evropian të Ngushticës së Bosforit në vendin e quajtur Yenikapi, kalon nën det dhe përfundon në anën aziatike të Stambollit në vendin e quajtur Harem. Tuneli do të lidhet me Autostradën D-100.
Sa kushton të kalosh?
Është super projekt që ka kushtuar shumë, por jo pak do tu kushtojë edhe atyre që do ta përdorin për të kaluar nga Evropa në Azi dhe anasjelltas me makinë. Ministria turke e Transporteve ka njoftuar se çmimi për një veturë do të jetë 4 dollarë plus TVSH, ndërsa për minibusët çmimi do të jetë 6 dollarë plus TVSH. Autobusët dhe makinat e tjera të tonazhit të rëndë është e ndaluar të kalojnë në tunel.
Kur do të hapet?
Tuneli inaugurohet në martën nga Presidenti edhe kryeministri turk ndërsa automjetet e para do të kalojnë të mërkurën në mëngjes.
Sa ka kushtuar?
Themelet për tunelin “ Avrasja” janë hedhur në vitin 2011. Tuneli ka kushtuar plot 1.3 miliardë dollarë dhe është financuar nga konsorciumi privat “ATAS”, i cili do të vjelë të ardhurat nga tuneli dhe do ta menaxhojë atë për 24 vjet e 5 muaj.
Më pas tuneli do t’i dorëzohet shtetit turk. Shteti ka garantuar kompaninë se çdo ditë do të kalojnë të paktën 35 000 automjete. Nëse kalojnë më pak, shteti turk do të subvencionojë kompaninë private.
Cilët automjete mund ta përdorin tunelin?
Tuneli është projektuar në mënyrë të tillë që të përdoret vetëm nga automjete të tonazhit të ulët si vetura dhe minibusë. Automjetet e tonazhit të rëndë dhe dy-rrotakët nuk lejohet të kalojnë në tunel.
Sa rezistent ndaj tërmeteve është?
Tuneli “Avrasja” është projektuar që t’i rezistojë edhe tërmetit 9 ballësh./tvklan.al
