Ajo është ndër ndërtimet e vjetra që i ka rezistuar kohës dhe element dallues në kryeqytet. Bëhet fjalë për urën e tabakëve, e cila i ka rezistuar kohës dhe për fat të mirë nuk është shembur. Fotoja e vjetër është postuar nga Artan Shkreli. “Ndoshta pamja me e bukur dhe romantike, e te gjitha kohërave, e Tiranës (foto: rrapt’e Tabakve)”, shkruan Shkreli.
Por cila është historia e kesaj ure?
Ura ka një lartësi rreth 7 metër e gjysëm. Ura e Tabakëve, e cila e mori këtë emër për shkak të pozitës së veçantë të esnafit të Tabakëve në jetën ekonomike dhe shoqërore të Tiranës në shekujt XVII-XVIII, ka një strukturë të gurtë, të formuar me dy harqe dhe e shtruar me kalldrëm. Ajo dallon për arkitekturën e saj harmonike, si dhe për shpërndarjen proporcionale të elementeve të saj. Ura përbëhet nga një hark kryesor, mbi të cilin ngrihet ura në formë kurrizi. Ky hark e ka hapësirën e dritës 8 metra dhe është ndërtuar me 2 rreshta harqesh anësor me trashësi 1 metër. Lartësia nga niveli i ujit ishte 3,5 metra. Kalldrëmi i urës me gjerësi 2,5 metra, ndërtuar me gurë lumi të vendosur pa ndonjë rregull. Në të dy anët e harkut kryesor janë ndërtuar 2 harqe në formë segmentesh rrethor me hapësirë të vogël.
