Nga Erjon Çiku/
Në një kohë kur fushata zgjedhore ende nuk ka nisur zyrtarisht (edhe pse ekranet nuk japin gjë tjetër veçse kandidatët për bashki) ka nisur puna për të vënë “lustrën” e fundit mbi projektet dhe premtimet e pambajtura.
E tillë është situata në vendin tonë, ku njerëzit votojnë për të dhënë mandat 4 vjeçar kryetarit të bashkisë, por se puna bëhet vetëm në 40 ditët e fundit. Në këtë histori “suksesi” Bashkia e Tiranës zë vendin e parë.
JavaNews.al ka ndjekur nga afër, një natë pune të bashkisë, në përpjekjen për t’i dhënë kryeqytetit, minimumin e mundshëm, vizat e bardha. Në fakt pasi nxitoi të mbyllë gropat “thithëse” nëpër të gjitha rrugët e kryeqytetit, tashmë bashkia po përpiqet të vërë edhe dorën e fundit, përpara se populli të japë fjalën e tij me votë.
Dhe bashkia ka punuar “fort”…të paktën gjatë natës. Janë vijëzuar, ashtu gjysma-gjysma, rrugët e Tiranës, por kjo jo për fajt të bashkisë por se nuk premtonte koha sepse po zbardhte dita, ose në raste të tjera nuk dilte boja.
Por si për ironi, në shtetin fqinj të Italisë, një shqiptar me emrin Indrit Mema tërhoqi vëmendjen e mediave italiane. Kjo pasi në një video të regjistruar mëngjesin e 13 Qershorit të vitit të shkuar, ai shfaqet duke vijëzuar për rreth 4 minuta diçka më shumë se një kilometër rrugë në Komunën e Valtelinës, në veri të Italisë, shumë pranë me kufirin zviceran.
Duke bërë një krahasim të tillë lind pyetja: Edhe për sa kohë shqiptarët do të duhet të presin 4 vite për një punë që siç e tregon një tjetër shqiptar, mund të bëhet për 4 minuta?
