Sulmohet me bojë kandidati nga LSI që pranoi mandatin e deputetit, Ralf Gjoni. Report Tv mëson se Gjoni u sulmua sapo doli nga shtëpia, ku poshtë hyrjes së pallatit e priste një djalë. Ai e ka qëlluar me bojë të kuqe. Gjoni sapo kishte dalë nga banesa e tij për të shkuar në Kuvendin e Shqipërisë, pasi në seancën e sotme do të bëjë betimin si deputet i ri pas djegies së mandateve nga opozita.
Një djalë i ri po e priste tek dalja e pallatit, dhe me të dalë, siç raportohet për Report Tv, djali ka hedhur bojë me shiringë drejt Gjonit.
Nuk dihet ende çfarë solucioni kimik është përdorur ndaj Ralf Gjonit, por boja ishte me ngjyrë të kuqe.
Gjoni konfirmon se një pjesë e mirë e bojës nuk hiqet nga lëkura dhe ka djegie brenda syve.
“Dukej qartë që prita dukej ishte e porositur nga lart”, thotë Gjoni pas ngjarjes.
Përpara se të hynte në godinën e legjislativit, Gjoni foli për mediet duke thënë se nuk hynte në Kuvend për një rrogë “të qelbur”, siç e cilësoi, e garantoi se nuk do t’i bënte as fresk qeverisë.
“Nuk kam ardhur këtu për të marrë një rrogë të qelbur.
Kam vendosur të futem në Kuvend, kam ardhur të betohem, për të përfaqësuar të gjithë ata shqiptarë të papërfaqësuar nga këta politikanë të papërgjegjshëm.
Unë jam shtetas shqiptar dhe i huaj, jam i shkolluar jashtë dhe i punësuar jashtë.
Nuk kam ardhur këtu në Kuvend për t’i bërë fresk qeverisë.
A më njihni mua apo jo?”, tha Ralf Gjoni
Më herët kryetarja e Lëvizjes Socialiste për Integrim Kryemadhi i ka quajtur tradhetare kandidatet nga listat e partisë së saj në zgjedhjet parlamentare të 2017-ës., që e pranuan mandatin.
“Të jenë të kujdesshëm se nuk ka për t’jua falur asnjeri, tradhtarë”, shprehej Kryemadhi.
