Vijon rituali i festës së besimtarëve bektashinj në malin e Tomorrit. Edhe pse në kohë pandemie, mijëra pelegrinë nga e gjithë Shqipëria kanë zgjedhur që të ngjitën deri në majë të malit për të adhuruar Abaz Aliun dhe për t’u lutur.
Çdo vit, nga data 18 deri në datën 25 gusht, mali i Tomorrit shndërrohet në vendin shpirtëror për mijëra peligrinë, që nuk kanë munguar as kësaj herë të pafrikësuar nga Covid-19.
“Vijmë në mal për të adhuruar shenjtin Abaz Ali dhe për t’u lutur për paqe e mirësi në familjet tona. Zoti i shikon dhe i ruan pelegrinët nga e keqja,”-shprehen besimtarët.
Kryegjyshi Botëror i Bektashinjve, Baba Mondi ka deklaruar nga Teqeja e Kulmakut se fluksi i madh i pelegrinëve drejt Malit të Tomorrit ishte i pabesueshëm duke marrë parasysh pandeminë.
“Nuk i ndalojmë dot pelegrinët të vijnë në këtë mal të shenjtë dhe të adhurojnë zotin e tyre. Ne si Kryegjyshatë Botërore e Bektashinjve kemi marrë masat e nevojshme për mbarëvajtjen e festimeve në mal, kemi kryer dezinfektimin e të gjithë zonës, kemi rregulluar rrugën drejt malit, kemi siguruar ujin dhe dritat,ndërkohë që në bashkëpunim edhe me bashkitë Skrapar, Berat e Poliçan kemi siguruar praninë e mjekëve dhe ambulancave për tu ardhur në ndihmë çdo pelegrini që mund të ketë probleme shëndetësore,”- ka thënë Baba Mondi.
Sipas traditës, peligrinët mbërrijnë në pikën më të lartë të malit Tomorr ku në një teqe të vogël prehet shenjti Abaz Ali, vëllai i gjetur i profetit Muhamet. Sapo përfundojnë lutjen, ngrejnë çadrat dhe më pas ndezin qirinjtë në vendet e shenjta, dhurojnë të holla dhe bëjnë kurban një deleje apo qengj.
Për mbarëvajtjen e Peligrinazhit të shenjtë në Malin e Tomorrit si dhe për të siguruar respektimin e protokolleve të sigurisë për shkak të Covid-19, Drejtoria Vendore e Policisë së Beratit,ka hartuar që prej datës 18 gusht një plan të detajuar masash, duke shtuar kontrollet dhe efektivët e policisë rrugore përgjatë të dyja akseve që të çojnë drejt Teqesë së Kulmakut në Malin e Tomorrit si dhe në vendin ku zhvillohet peligrinazhi.
g.kosovari
