Forcat e Armatosura të Serbisë kanë marrë pjesë në stërvitjen e përbashkët ushtarake “Platinum Wolf 23”. Në këtë aktivitet morën pjesën Zv.Presidenti, njëherazi ministri i Mbrojtjes së Serbisë, Millosh Vuçeviq, së bashku me shefin e Shtabit të Përgjithshëm të Forcave të Armatosura të Serbisë, gjeneralin Milan Mojsiloviq. Në stërvitje mori pjesë edhe ambasadori i Shteteve të Bashkuara të Amerikës në Serbi, Christopher Hill.
Sipas mediave serbe, në stërvitje morën pjesë rreth 600 oficerë, nënoficerë dhe ushtarë të forcave të armatosura të Shteteve të Bashkuara të Amerikës, Bosnjë-Hercegovinës, Britanisë së Madhe, Greqisë, Italisë, Hungarisë, Rumanisë, Maqedonisë së Veriut, Sllovenisë dhe Serbisë.
Ministri Vuçeviq, pas stërvitjes, i përgëzoi të gjithë pjesëmarrësit për ushtrimin e realizuar me sukses dhe e vlerësoi atë si “shumë të mirë”. Siç theksoi ai, Forcat e Armatosura të Serbisë për të tetën herë organizojnë stërvitjen më të madhe ushtarake ndërkombëtare në territorin serb.
Ai falënderoi të gjitha vendet pjesëmarrëse në stërvitjen “Platinum Wolf 23” dhe shtoi se në këtë mënyrë forcojmë marrëdhëniet tona të partneritetit “duke mos kundërshtuar anëtarësimin e njëri-tjetrit në aleanca të caktuara ushtarake apo vendimet për të qenë shtete ushtarakisht neutrale”.
Ambasadori i Shteteve të Bashkuara të Amerikës në Serbi, Christopher Hill, falënderoi për ftesën për të marrë pjesë në këtë në këtë stërvitje të rëndësishme ushtarake ndërkombëtare, siç e cilësoi ai.
Pjesëtarët e Forcave të Armatosura të Serbisë dhe të Forcave të Armatosura të nëntë vendeve në terrenin stërvitor “Borovac” dhe në bazën “South” praktikuan taktikat, teknikat dhe procedurat që zbatohen gjatë përfshirjes në operacione paqeje, me theks në përdorimin e armëve jovdekjeprurëse, lufta në një mjedis urban, mbrojtja e bazës, kontrolli i grumbullimit masiv dhe puna në postblloqe.
Stërvitja ndërkombëtare “Platinum Wolf” në Serbi zhvillohet që nga viti 2014 dhe rëndësia e saj reflektohet në ngritjen e kapaciteteve për planifikimin, organizimin dhe kryerjen e stërvitjeve ndërkombëtare, si dhe aftësinë e njësive të Forcave të Armatosura Serbe për t’u angazhuar në operacione shumëkombëshe.
/a.r
