Një shqiptar, oficer policie i forcave të ndërhyrjes sepeciale SEPTA në Filadelfia u qëllua me armë zjarri gjatë një operacioni mbrëmjen e të mërkurës ndërsa përpiqej të merrte në mbrojtje të sigurt një oficer tjetër gjatë një shkëmbimi zjarri me një të dyshuar të armatosur që qëllonte ndaj forcave të policisë duke bërë rezistencë. Oficeri mbeti i plagosur në stomak,por jashtë rrezikut për jetën.
Ervis Onuzi, 28 vjeç, kishte tre vite i inkuadruar në SEPTA. Gjithçka ndodhi rreth orës 19:00 kur një i dyshuar për plagosjen me armë të dy grave në rrugë, në tentativë për tu larguar, u fut brenda një pallati në kompleksin “Renehan House” në rrugën Leiper dhe filloi të qëllonte ndaj policisë.
Ai qëlloi nga kati i dytë dhe i tretë i ndërtesës.
Onuzi, që u vendos në rrethin e parë të sigurisë u qëllua të paktën një herë në stomak. Ai u dërgua në Spitalin Universitar Temple ku ju nënshtrua një operacioni dhe ndodhet në gjendje të qëndrueshme.
Edhe gratë e plagosura të moshës 57 dhe 42 vjeçe janë në gjendje të qëndrueshme në spital.
Ndëkohë agresori sipas policisë u gjet i vdekur me një plagë e vetëshkaktuar me armë zjarri në katin e dytë të ndërtesës, aty ku u gjet dhe një armë. Askush nuk u lëndua brenda ndërtesës./m.j
