Polumbarët e RENEAS nisën kërkimet në liqenin e Shkopetit për gjetjen dhe nxjerrjen e mjeteve të konstatuar një ditë më parë në thellësinë e liqenit. Kërkimet nisën dje pas sinjalizimeve për rrëzimin e një mjeti. Nga verifikimet rezulton se nuk ka asnjë person të vdekur nga ngjarja, dhe targa e gjetur rezultonte e vjedhur.
Po ashtu, dyshohet se në të njëjtin vend janë hedhur mjete të tjera të përdoruara për vepra penale.
Deri në këto momente nuk ka asnjë njoftim për ndonjë shtetas të humbur. Ndërkohë dyshohet se këto mjete janë përdorur për vepra penale. Nuk përjashtohet përdorimi i mjetit të rrëzuar të martën nga grabitësit e Rinasit.
NGJARJA
Në Sallën Operative të Komisariatit të Policisë Mat, ka ardhur një telefonatë nga një peshkatar i zonës, i cili ka njoftuar se ka parë gjurmë të freskëta të gomave të makinës në afërsi të liqenit Shkopet dhe dyshon se në liqen mund të ketë rënë ndonjë automjet.
Menjëherë në drejtim të liqenit të Shkopetit kanë shkuar forcat e Policisë të Komisariatit të Policisë Mat, ku kanë konstatuar se:
Në afërsi bregut të liqenit dhe poshtë rrugës nacionale kishte gjurmë të freskëta të gomave të automjetit si dhe pjesë të parafangos, parakolpit e xhama të thyer.
Po nga kontrolli i vendit ku dyshohej se mund të kishte rënë automjeti në liqen, Policia ka gjetur njërën prej targave të automjetit, konkretisht targën AA 969 ND. Nga shërbimet e policisë të Komisariatit të Policisë Mat është bërë identifikimi i targës së gjetur në vendngjarje, targë e cila i përket automjetit tip Benz në pronësi të shtetasit M.P nga Karbunara Lushnjë.
Targat janë denoncuar të vjedhura në Komisariatin e Policisë Lushnjë, në Janar 2016 nga shtetasi M.P.
Theksojmë që ky shtetas ka denoncuar vetëm targat të vjedhura, jo automjetin.
Në vendngjarje kanë mbritur Polumbarët e Reneas të cilët kanë kontrolluar gjithë perimetrin e liqenit ku dyshohej se kishte rënë automjeti. Polumbarët gjatë zhytjeve të kryera kanë konstatuar në thellësinë 18 metra dhe në thellësinë 25 metra dy automjete .
Me ndihmën e një mjeti të rëndë vinç, polumbarët dhe forcat e policisë të Komisariatit të Policisë Mat, kanë bërë të mundur nxjerrjen në anë të liqenit të njërit prej automjeteve të konstatuara, konkretisht automjetin autovetruë tip Benz me targë FFV562 (Suedeze).
Nga kqyrja paraprake, shenjat e konstatuara si, “llumi mbi sipërfaqjet e lëmura të mjetit” rezulton se ky mjet ka kohë që ndodhej brenda në liqen. Gjithashtu po nga kqyerja paraprake rezultoi se në automjet nuk kishte asnjë viktimë.
