(FOTO) “Me një marmitë të re, shtyhet edhe për katër vjet”. Charlie Hebdo gjerman hapet me Merkel

Revista satirike Charlie Hebdo ka nisur edicionin e saj gjerman dhe në kopertinën e numrit të parë personazhi është kancelarja Angela Merkel.
Merkel, e cila do të kandidojë sërish, ka nevojë për ndihmën e një mekaniku të Volkswagenit për t’u ringritur, pas rënies së popullaritetit.
Karikatura lë të kuptohet se Volkswagen, i goditur nga skandali i emetimit të gazrave, “qëndron pas Merkelit” dhe tregon kancelaren të shtrirë mbi një platformë, ndërsa mekaniku thotë se “me një marmitë të re, kjo bën edhe për katër vjet të tjerë”.

Posteri i publicitetit për edicionin gjerman tregon Merkelin të ulur në tualet, duke lexuar revistën, ku shihet sllogani “Charlie Hebdo të çliron”.

Edicioni i parë i revistës në një gjuhë të huaj është një risi që vjen thuajse dy vjet pas sulmit në redaksi, ku pothuajse i gjithë stafi u vra nga xhihadistët.
Numri i parë, i shtypur në 200 mijë kopje, paraqet një reportazh grafik prej katër faqesh nga karikaturisti dhe botuesi Laurent Sourisseau, i njohur më mirë me emrin e artit, Riss, i cili ka portretizuar njerëz që ka takuar dhe opnionin e tyre mbi identitetin kombëtar, fluksin e refugjatëve në Gjermani dhe probleme të tjera sociale.
Riss ishte ndër të plagosurit rëndë në sulmin e janarit 2015.
Ndërkohë, media gjermane e ka mirëpritur edicionin e Charlie Hebdo, ndonëse shpeshherë me karikaturat e saj i kalon kufijtë e shakave me kripë.
The Guardian/d.i.