Kryetari i Partisë Socialdemokrate, Dardan Molliqaj, bashkëshorti i ish-ministres së Arsimit, Besa Shahini është arrestuar nga Policia e Kosovës.
Kjo nuk është hera e parë që Molliqaj arrestohet nga policia. Sot, bashkë me të u ndaluan edhe pesë aktivistë të kësaj partie, pasi kanë penguar konferencën për media të kryetares së Gjykatës Speciale, Ekaterina Trendafilova.
Lajmin për arrestimin e tyre e ka konfirmuar, zëdhënësja e PSD-së, Natyra Kuçi.
Sipas mediave kosovare, aktivistët e kësaj partie, Bardh Ahmeti dhe Visar Perolli, kanë hyrë në vendin ku po mbahej konferenca, duke fishkëllyer drejt kryetares së Speciales. Aktivistë të tjerë kanë shkruar “Non Grata” në një nga makinat e EULEX-it.
“Nuk mund ta lejojmë të kalojë në qetësi, është përfaqësuese e një gjykate të padrejtë që nuk mund të sjellë qetësi, duan ta ndryshojnë historinë e luftës së Kosovës, duke e bërë si një luftë që ka ndodhë në mes të dy agresorëve, e jo si një luftë për liri”, thanë aktivistët e PSD-së.
Trendafilova tha se i vjen keq që nuk e kupton gjuhën shqipe për të ditur se çka thanë dy të rinjtë, megjithatë, i ka ftuar të njëjtit të kthehen në konferencë, për të bërë pyetje ndaj saj.
Në pamjet e siguruara nga mediat e Kosovës, duket Molliqaj i gjakosur në kokë dhe i shtrirë teksa polici i ka vendosur gjurin në fyt.
Dardan Molliqaj është bashkëshorti i Besa Shahinit, politikania nga Kosova që shërbeu në Shqipëri për më pak se dy vite si Ministre e Arsimit.
