Rastet e riinfektimeve me Covid 19 sa po vijnë e po shtohen, sidomos pas përhapjes së varianteve të reja të virusit në botë.
Një gjë të tillë e konfirmon edhe moderatorja e njohur për publikun, Fioralba Ponari, e cila ka pohuar se është infektuar për herë të dytë me virusin e rrezikshëm.
Lajmin e bëri me dije vetë ajo ditën e djeshme, përmes një postimi në rrjetet sociale, ku dhe ndau me të gjithë rezultatin e testit pozitiv.
Gjatë një bashkëbisedimi me ndjekësit, moderatorja ka treguar dhe simptomat që po kalon.
E pyetur nga një ndjekës, nëse po e kalon më lehtë duke qenë se ka antitrupa, Fjoralba thotë: “Jo, kur ke Covid 2.0. Keq shumë kësaj radhe. Temperatura, mungesa e shijes apo kolla, paskan qenë lule krahasuar me dhimbjen e kockave që po heq kësaj radhe”, – pranon ajo.
Ndërkaq, moderatorja thekson se që nga koha kur zbuloi përmes testit serologjik se kishte antitrupa, kanë kaluar të paktën 7 muaj nga infektimi i parë.
Më tej, ajo zbuloi dhe simptomat që kuptoi se kishte rezultuar sërish pozitive.
“Tensioni i ulët (që nuk më ka ndodhur kurrë) dhe humbja e balancës (e justifikova me pagjumësinë dhe lodhjen në punë), më bënë të kisha dyshime, por prapë më dukej e vështirë, duke pasur parasysh që e kam kaluar dhe se sa e kujdesshme kam qenë. Pikat mbi “i” i vuri temperatura në darkë dhe dhimbja therëse e kockave”, – tregon Ponari.
Një pyetje tjetër lidhej me diferencën kohore nga infektimi i parë me këtë të dytin, së cilës Fjoralba iu përgjigj:
“Kohën e saktë të infektimit nuk e di, por di që në fund të qershorit pata disa shqetësime dhe vendosa të bëja serologjikun për antitrupat, ku dhe më doli që e kam kaluar… kështu që i bie të paktën shtatë muaj nga infektimi i parë”.
g.kosovari
