Ndotja e ajrit në Nju Dehli dhe qytetet përqark tij, kanë arritur këtë të dielë të 3 nëntorit, nivelin më të lartë për vitin 2019. Autoritetet në kryeqytetin më të ndotur në botë, kanë shpallur emergjencë të shëndetit publik, si dhe kanë urdhëruar mbylljen e shkollave dhe parqeve publike.
Indeksi që mat cilësinë e ajrit, matur që në orën 2 të mëngjesit, ka tejkaluar nivelin 900, kur alarmi shpallet që në nivelin 500. Çdo banor i kryeqytetit indian thith çdo ditë ndotjen e barasvlershme me 50 cigare.
Në Nju Dehli jetojnë 40 milionë banorë, pjesa më e madhe e të cilëve vuajnë nga probleme të mushkërive dhe frymëmarrjes ndërsa gjatë orëve të fundit, autoritetet kanë anuluar mbi 30 fluturime nga aeroporti i Nju Dehlit, për shkak të shikueshmërisë së dobët. Rrugët janë boshatisur pasi pjesa më e madhe e banorëve kanë qëndruar në shtëpi, për të mos ekspozuar veten.
Por sipas BBC, kryeqyteti Indian, ka filluar një sistem të racionimit të makinave pasi lufton me nivele të rrezikshme të ndotjes.
Nga 4 deri në 15 nëntor, vetëm makinat me njësi dhe me targa të veçanta do të lejohen në rrugë çdo ditë, thanë zyrtarët.
Një sistem i tillë është përdorur më parë, por nuk është e qartë nëse në të vërtetë ndihmon në uljen e ndotjes.
Sidoqoftë, makinat nuk besohet të jenë shkaktari kryesor i ajrit toksik të Delhi, pasi ekspertët tregojnë se ndotja vjen nga djegia e bimëve nga fermerët në shtetet fqinje për të pastruar fushat.
Zyrtarët shëndetësorë u kanë kërkuar njerëzve që të qëndrojnë brenda dhe të mos bëjnë ndonjë aktivitet fizik pasi miliona njerëz janë në rrezik të sëmundjes së frymëmarrjes.
Ekspertët thonë se emetimet nga automjetet janë vetëm një nga disa faktorë që e kanë kthyer qytetin në një “dhomë gazi”./ Javanews
g.kosovari
