Vizita e parë zyrtare në Shqipëri e Presidentit të Francës, Emmanuel Macron veç mesazheve për integrimin, është shoqëruar në nënshkrimin e disa marrëveshjeve të rëndësishme në fushën e ekonomisë.
Një ndër këto marrëveshje ishte ajo mes “Grupit Kastrati” dhe konglomeratit ndërkombëtar “Lagardère Travel Retail”, e cila do të operojë edhe në Shqipëri.
Marrëveshja u firmos ditën e sotme nga Presidenti i “Grupit Kastrati”, Shefqet Kastrati dhe Catherine Guyomard, Kryetare e Komitetit Ekzekutiv të Lagardère Travel Retail, në prani të Presidentit të Francës dhe kryeministrit Edi Rama.
“Grupi Kastrati, ka nënshkruar sot në ambientet e aeroportit “Nënë Tereza”, në Tiranë, një marrëveshje të rëndësishme me konglomeratin francez Lagardere, për zhvillimin e përpjekjeve të përbashkëta për zgjerimin e mëtejshëm të aktivitetit të dyqaneve duty-free dhe shitjes me pakicë në të gjithë Shqipërinë.
Marrëveshja u nënshkrua nga presidenti i grupit Kastrati, Shefqet Kastrati dhe Catherine Guyomard, Kryetare e Komitetit Ekzekutiv të Lagardère Travel Retail (divizioni i shitjes me pakicë të Lagardère).
Gjatë ceremonisë ishin të pranishëm, Presidenti i Frances, Emmanuel Macron dhe kryeministri i Shqipërisë, z. Edi Rama.
Marrëveshja e nënshkruar mes grupit Kastrati dhe Lagardère Travel Retail konsiston në zgjerimin e aktivitetit të shitjes me pakicë dhe shtrirjen e shërbimit pa doganë në të gjitha pikat kufitare dhe qendrat kryesore turistike në Shqipëri. Këto dy grupe janë të përkushtuar që krahas zgjerimit të rrisin ndjeshëm cilësinë e shërbimit si dhe shumëllojshmërinë e produkteve”, thuhet në njoftimin për shtyp të Aeroportit Nënë Tereza.
Grupi Kastrati u themelua në vitin 1991 dhe sot zhvillon aktivitetin e tij në të gjithë rajonin e Ballkanit duke punësuar mbi 4000 punonjës. Grupi Kastrati, i njohur kryesisht për tregtimin me shumicë dhe pakicë të hidrokarbureve, zhvillon një aktivitet të rëndësishëm në fusha si: sigurime, ndërtim, infrastrukturë, turizëm, industri automjetesh etj./m.j
