Ky është Aleksandër Barlika, 35 vjeçari nga Mati që gjeti vdekjen në Spitalin e Traumës pasi një ditë më parë u qëllua me çifte në Bathore.
Sipas të dhënave nga Spitali ai nuk arriti t’u mbijetonte plagëve të marra në organet jetësore. Burime zyrtare nga policia bëjnë me dije se 35-vjeçari ishte babai i dy fëmijëve dhe prej disa kohësh kishte hapur një lokal në zonën e Kamzës.
Mesditën e djeshme ai bashkë më vëllain e tij Altinin, shkoi në Bathore për të zgjidhur mosmarrëveshjen mes nipit të tij 16-vjecar dhe një bashkëmoshatari të këtij të fundit.
Sipas policisë, sherri ka nisur mes dy të rinjve K.P dhe L.C. Më tej në këtë sherr janë përfshirë edhe dy dajat e 16-vjeçarit K.P, Aleksandër dhe Altin Barlika si dhe babai i 16-vjeçarit tjetër, Rasim C. Ata janë konfliktuar fillimisht me mjete të forta me njëri-tjetrin por më pas kanë shkuar deri në përdorim të armëve të zjarrit.
Dy vëllezërit Barlika të shoqëruar edhe nga nipi i tyre K.P kanë nxjerrë pistoletën dhe kanë tentuar të qëllojnë ndaj L. C., D. C. dhe Rasim C. Në këtë kohë duke përfituar nga rrëmuja e krijuar, 16-vjeçari L. C ka marrë një armë gjahu me të cilën ka qëlluar Aleksandër Barlikën i cili ka gjetur vdekjen si pasojë e plagëve të marra, ndërsa vëllai i tij Altin Barlika pësoi dëmtime të lehta trupore.
Në vendin e ngjarjes janë sekuestruar në cilësinë e provës materiale nga policia një armë zjarri pistoletë TT me një krëhër dhe 8 fishekë dhe një çifte.
Ndaj të arrestuarve rëndojnë veprat penale të ndryshme, “Vrasja me dashje”, “Vrasja me dashje e mbetur në tentativë në bashkëpunim”, “Plagosja e lehtë me dashje”, “Prodhimi dhe mbajtja pa leje e armëve luftarake dhe e municionit” dhe “Moskallëzimi i krimit”. /a.m.
