Gruaja që ka për kumbar Vladimir Putinin thuhet se ka marrë nënshtetësinë izraelite dhe ka shitur apartamentin e saj në Moskë pas agresionit rus të Ukrainës. Ajo është 40-vjeçarja Xenia Sobchak, e cila është një prezantuese e rëndësishme televizive dhe politikania kryesore femër e opozitës ruse.
Thuhet se Sobchak ka siguruar nënshtetësinë izraelite për veten dhe djalin e saj të vogël dhe se njëherësh ka shitur një apartament luksoz në Moskë për më shumë se 10 milionë dollarë. Vihet re se Sobchak që në fillim ishte kundër pushtimit rus të Ukrainës.
Putin ka lidhje të gjata me familjen e saj. Babai I 40-vjeçares, Anatoly Sobchak, ishte profesori dhe mentori i Putinit në drejtësi, si dhe ai që i dha atij hapin e parë në politikë si nënkryetar i bashkisë së Shën Petersburgut.
Sipas Daily Mail, Putin e çoi ilegalisht Sobchak nga Rusia në Perëndim për trajtim mjekësor dhe kjo ndodhi kur mentori i tij kërkohej për një rast të dyshuar korrupsioni. Në vitin 2000, Putin u fotografua me nënën e Xenia-s në funeralin e Sobchak.
Në të njëjtën kohë, raportet nga Izraeli dhe Rusia qëndrojnë mbi lidhjet hebraike të Xenia-s me nënën e saj. Xenia Sobchak thuhet se ka marrë nënshtetësinë izraelite ndërsa ishte me “pushime” atje që nga fillimi i marsit.
Megjithatë, një muaj më parë, pasi konfirmoi se ishte në Izrael për pushime, ajo shtoi se “Unë jam ruse, jam shtetase e Rusisë. Unë nuk emigroj askund, nuk kam kombësi të tjera”. Më herët të shtunën ajo njoftoi përmes rrjeteve sociale se ndodhej në Rusi.
Ajo jo vetëm që nuk mohoi raportimet për shtetësinë e saj të re, por pretendoi se ato vinin nga mediat “propagande” të Putinit. Një burim, ndërkohë, pohoi se Sobchak kishte “frikë nga represioni” në Rusinë e Putinit dhe kishte rregulluar të largohej nga vendi.
“Paris Hilton i Rusisë” që bëri revolucionin e saj
40-vjeçarja – e cila për flokët e saj biondë u quajt “Paris Hilton e Rusisë” nga mediat ruse – ka bërë revolucionin e saj në dhjetë vitet e fundit. Ajo kritikoi ashpër politikat e Putinit, duke e deklaruar veten socialiste, ndërsa shprehu kundërshtimin e saj ndaj luftës së kumbarit të saj në Ukrainë.
“Çështja kryesore – është një konflikt i vërtetë me Ukrainën – në të cilin askush, madje as unë, nuk besuam se do të ndodhte deri në fund. Kur Rusia njohu Republikat Popullore të Donbasit, dukej se një lloj ndërmjetësimi kishte marrë fund. Ky ishte fillimi. Konflikti ushtarak ka filluar”, shkroi Sobchak në një postim të gjatë në Instagram, duke shtuar: “E vetmja gjë që është e sigurt është se njerëzit po vdesin”.
Vihet re se si gazetare, Xenia Sobchak komenton agresionin rus të Ukrainës, ndërsa shpesh merr pjesë në demonstratat e opozitës ruse dhe denoncon në mënyrë sistematike Kremlinin në rrjetet sociale.
g.kosovari
