Izolimi në shtëpi për pjesën më të madhe të njerëzve, ndërprerja e aktiviteteve dhe bllokimi i qarkullimit nga frika e koronavirusit, ka bërë që rrugët e Tiranës të jenë më të zbrazura se kurrë.
Në fotogaleri mund të shikoni se si u gdhi kryeqendra e vendit, mes pasigurisë, ankthit dhe të panjohurës që do të ndodhë në vijim.
Kjo pasi nga sot dhe të paktën deri të dielën, askush nuk do të lejohet që të lëvizë me makina private brenda në Tiranë, ndërkohë që transporti urban dhe shërbimi taksi u ndalua, ashtu sikundër baret dhe lokalet janë mbyllur.
Një zbrazje e tillë e kryeqytetit nuk mbahet mend të jetë parë prej kohësh, madje as në ditën e parë të ndërrimit të viteve… kur në atë ditë sërish disi më vonë, qytetarët nuk bëjnë dot pa e rrëkëllyer një kafe. E sot duket se kafja turke do të ziejë në masë sërish në xhezve si dikur.
Kufizimet e detajuara në qarkullim
-Nga dita e premte, datë 13.03.2020, ora 06:00, deri të dielën, datë 15.03.2020, ora 00:00, të mos lejohet të qarkullojnë automjete të transportit ndërurban, automjetet private drejt Tiranës dhe Durrësit apo anasjelltas, nga Tirana dhe Durrësi, në drejtim të zonave të tjera të vendit.
-Nga dita e premte, datë 13.03.2020, ora 06:00, deri të dielën, datë 15.03.2020, ora 00:00, të mos lejohet qarkullimi i automjeteve private brenda në qytetin e Tiranës, Durrësit, Shkodrës, Lezhës, Elbasanit, Lushnjës, Fierit dhe Vlorës.
-Qarkullimi i automjeteve në këto territore do të jetë i hapur vetëm për autoambulancat dhe automjetet që kryejnë funksione shërbimi shtetëror (personeli shëndetësor dhe social dhe shërbimet mbështetëse në strukturat e kujdesit shëndetësor, publike dhe jopublike, personeli i farmacive publike dhe jopublike, personeli që ofron shërbimet e furnizimit me ushqime, medikamente, shërbimet e kateringut, shërbimet postare, zjarrfikëse, funerale, energjisë, ujësjellës kanalizime, shërbimet private të ruajtjes së sigurisë së objekteve, shërbimet aeroportuale dhe personeli i linjave ajrore), duke dërguar pranë adresave të email-it: simon.mice@asp.gov.al, mitat.tola@asp.gov.al, fetah.guri@asp.gov.al dhe skender.ismaili@asp.gov.al, listën e personave të autorizuar dhe duke i paraqitur punonjësve të Policisë një kopje të këtij email-i.
-Qarkullimi i automjeteve të personave me sëmundje kronike që kanë të planifikuara terapi mjekimi në spitale, duke provuar përmes një dokumenti nevojën për trajtimin e tyre, do të jetë i hapur.
-Do të lejohen të qarkullojnë automjete të personelit të medias, duke paraqitur dokumentin e tyre të punësimit ose kartën e gazetarit.
-Për qarkullimin vajtje – ardhje nga aeroporti i Rinasit, drejtuesi i automjetit duhet t’i tregojë punonjësit të policisë, biletat e fluturimit të personave që do të largohen apo foton e biletave të personave që do të mbërrijnë.
-Marrja në automjetin e punës, e personave të familjes apo personave të tjerë që s’kanë lidhje me detyrën shtetërore është rreptësisht e ndaluar dhe do të ndëshkohet me sanksione të rënda të parashikuara në legjislacionin përkatës.
