Lhakpa Sherpa, ka ngjitur për të dhjetën herë malin Everest. Arritja e 48-vjeçares u raportua nga vëllai i saj dhe nga një zyrtar i Nepalit. Në këtë mënyrë ajo bëhet gruaja e parë që ka ngjitur 10 herë malin Everest.
Ajo ka lindur në një shpellë dhe nuk ka edukim formal. Sherpa, e cila është gjithashtu nënë, ka punuar si pastruese. Ajo u zgjodh nga BBC si një nga femrat më influencuese dhe inspiruese të vitit 2016.
Siç shkruan prestigjiozja britanike, puna dhe arritjet e Lhakpa-s tashmë duhet që të përkthehen në njohje dhe mirëqenie. Ajo është anëtare e grupit etnik Sherpa, pasardhës të tibetianëve nomadë.
“Unë kam lindur në një shpellë”, ka thënë ajo mes të qeshurave. “Nuk di as ditën e lindjes. Në pasaportë thuhet se jam 48”, ka thënë ajo.
Sherpa u martua me një ngjitës mali rumun dhe kanë jetuar në SHBA. Por lidhja e tyre zgjati deri në vitin 2015. Pas kësaj, Sherpa ka jetuar me vajzat në Connecticut.
Megjithatë arritjet e saj kanë kaluar pa u vënë re. Për shumë vite ajo ka jetuar duke punuar me rrogë minimale.
/a.r
