Tre aksione janë realizuar nga policia greke në rajonin e Atikës, në kuadër të një operacioni kundër lëndëve narkotike. Policia greke sqaron se grupi i parë i goditur merrej me trafikun e heroinës nga Irani si dhe të kokainës dhe kanabisit të papërpunuar.
Operacioni i nisur dje dhe i përfunduar sot në mëngjes (24 prill), u zhvillua paralelisht në disa zona, duke çuar në pranga 5 persona, të gjithë shqiptarë, të moshave 28,31,31,35 dhe 53 vjeç.
Gjatë operacionit, janë sekuestruar dy laboratorët për përpunimin e drogës, rreth 44 kg heroinë, rreth 10 kg pluhur për përpunimin e lëndës narkotike, para, armë, makina, motoçikleta dhe telefona celularë.
Policia greke sqaron në komunikatë, se të ardhurat e pritshme të organizatës kriminale, nga trafikimi i drogës së konfiskuar, i tejkalojnë 1 milion eurot.
Në aksionin e dytë, i zhvilluar dje, policia arrestoi edhe dy shtetas shqiptarë, anëtarë të organizatës. Në makinën e tyre, u gjetën rreth 817 kg kanabis dhe një sasi prej 7 kg e 435 gram kokainë. Edhe në rastin e dytë, policia greke sqaron se përfitimet i tejkalojnë shifrën e 1 milion eurove.
Në aksionin e tretë, u godit një organizatë kriminale që merrej me tregtimin e kokainës dhe kanabisit në zona të ndryshme të Pireut. Gjatë këtij operacioni, janë arrestuar 13 anëtarë të organizatës.
Policia ka sekuestruar 10 kg e 657 gram kanabis, 84 gram kokainë, peshore elektronike, armë, fara kanabisi, granatë tymuese, etj.
Zëvendësshefi i policisë Theodoros Chronopoulos, teksa bëri me dije detajet e operacionit, tha se pjesë e grupit të parë, janë edhe dy persona të tjerë, duke shtuar se njëri prej tyre është tashmë në qelitë e paraburgimit, ndërsa personi i dytë është në kërkim.
Në mënyrë të veçantë, rol qendror në organizatë e kishte 53 vjeçari i arrestuar, i cili bënte të mundur furnizimin dhe importimin e heroinës nga Irani dhe më pas lëvizjes e saj drejt Greqisë.
Anëtarët e tjerë të grupit, merreshin me transportin brenda Greqisë, magazinimin dhe shpërndarjen.
