Përgjegjësi për sigurinë në Aeroportin e Rinasit, Kastro Vaskues është shoqëruar në policinë e Tiranës pas grabitjes së 10 milionë eurove në mes të ditës sot në Rinas. Në orën 21:00 të mbrëmjes së sotme ai është shoqëruar në polici, ndërsa do të merret në pyetje nga grupi hetimor në lidhje me sistemin e sigurisë.
Sipas ligjit, përgjegjës për të garantuar sigurinë brenda aeroportit është Autoriteti Civil dhe kompania menaxhuese. Hetimet për grabitjen i kanë kaluar Prokurorisë së Krimeve të Rënda në kryeqytet. Grabitja theu edhe njëherë sistemin e sigurisë brenda perimetrit të aeroportit, ndërsa deri tani nuk ka asnjë të arrestuar.
Njëri nga autorët humbi jetën si pasojë e shkëmbimit të zjarrit me policinë, ndërsa të tjerët arritën që të largoheshin së bashku me miliona euro. E gjithë policia e shtetit është ngritur në këmbë për të shkuar në gjurmët e autorëve, por deri tani nuk ka asnjë të prangosur. Grabitësit kanë qenë njohës të mirë të zonës dhe e kanë planifikuar gjithçka në detaje.
